En 2009 lo collectiu « Iniciativas 1209-2009 » teniá, a l'escasença de son 800en anniversari, a comemorar la masscacre de Besièrs. Aquí çai-jos l'apèl que lançavan.
D’associacions* acampadas lo dissabte 26 de julh de 2008 a Rodés pendent l'Estivada an creat lo « Collectiu Iniciativas 1209-2009 ». Aquel collectiu demòra dobert a d'autras associacions, organizacions culturalas o socialas, personalitats que se voldràn plan inscriure dins la dralha d'aquel tèxt per que lo 800en anniversari de la crosada contra los albigeses siá commemorat dins un esperit d'educacion e de cultura popularas.
Aquel collectiu ten per tòca d’inventoriar las iniciativas que permetràn de remembrar d'un biais digne los eveniments e crimis que se debanèron per Occitània a partir de 1209. De las far metre en linha. De prepausar d'acamps de reflexion e d'escambis. De contribuïr a l'espandiment de l'informacion tan cap als elegits coma a la populacion.
« Tre las albas del sègle XIIen en país d'òc, èran a escriure en libertat las primièras paginas d’un libre de civilizacion que se dobrissiá, e aquí, a pro pena cent ans après, venguèron atudar lo lum d’un pòble a còp d'espasa, arroïnèron una civilizacion comola d’avenidor. Es aquel lum de civilizacion que cal celebrar ! » (Joan-Loís Blenet pendent l'acampada a Estivada).
Las iniciativas s’anóncian nombrosas e variadas : collòquis e conferéncias, espectacles de tota mena (animacions per carrièras, teatre, opèra, cançon etc.)
Lo « Collectiu Iniciativas 1209-2009 », vòl far saber los projèctes que son a se bastir e espèra d'unir los estatjants dels paises d'òc a l'entorn de las valors de la civilizacion occitana e de la sieuna identitat lingüistica e culturala. Desira d'obrar per que los projèctes se liguen entre eles tant coma possible.
Se làguia que la membrança de 1209 siá pas caricaturala. Volonta de velhar per que se faga ni folclòre medieval (que n'i a a bodre) ni escritura desformada de l'Istòria o, pièger encara, silenci amb negacionisme. Lo « Collectiu Iniciativas 1209-2009 » prepausa d'inscriure la granda membrança de la guèrra començada en 1209 dins l'espaci de la coneissença completa de çò que ne podèm saber. Vòl pensar aquel trabalh dins una amira de dialòg. Afortís que degun es pas cargat de tornar far la guèrra d'un còp èra. Vòl pas metre l'accent suls borrèls mas desira de far entendre al mond las valors que defendián los occitans de l'epòca quand ensajèron de resistir al Papa e al rei de França. En particular Larguesa, Convivéncia, Tolerància o Libertat de creire e de pensar, valors totjorn d’actualitat a l'ora d'ara. La civilizacion occitana naissenta del sègle XIIIen, caracterizada per una cultura de dobertura d’esperit e de libertat dins lo debat religiós, foguèt redusida a mercé per mai d’un mièg sègle d'una guèrra terribla. Aquí d'unes inventèron los tribunals d’enquèrre (inquisicion) de tan sinistra fama.
Contar 1209 e la seguidas serà l’escasença de tornar afortir que, se l’istòria se pòt pas jamai transformar, la se devèm aprene per ne traire de leiçons. Lo « Collectiu Iniciativa 1209-2009 » espèra que las valors defendudas amb bravor pels occitans d'un còp èra s’espandigan en libertat, e que la membrança n'ajudarà la renadiva bèla. Las celebracions devon endralhar de projèctes de país ont professionals e amators, actors economics e culturals, collectivitats localas e associacions poiràn trabalhar amassa per capitar e enauçar la capacitat de formacion e de creacion per l'occitan. La guèrra facha als paises occitans al sègle XIIIen la Crosada foguèt un eveniment de resson europèu e la membrança que s'aprèsta se deu far en partenariat amb Euròpa e los estatjants que demòran al país.
Lo « Collectiu Iniciativa 1209-2009 » lança un apèl a totes, (l'Estat, las collectivitats territoriales, las associacions, las personalitats e cada persona d'Occitània qu'o voldràn plan) a prene una part activa dins aquela membrança bèla de 1209 amb un esperit de dobertura.
Nòta :
* Las associacions : Coordinacion occitana de Besierés, IEO de Tarn, IEO d'Aude, Companhons de Paratge, Cercle occitan d'Albi, Teatre La Rampe-TIO, Gardarem la Tèrra, Art & culture network - Besièrs), Teatre los AD'ÒC (Narbona), Chambra d'Òc (Valladas), D'Arts e d'Òc (Tolosa), Novelum (ASCO Perigòrd), Rencontres en coeur d'Hérault (Clermont-Lodève), Companhiá de La Loue (Teatre Narbona).