Lo Partit de la Nacion Occitana comuniquèt al mes de mai de 2023 sus l'emplec de las lengas occitana e catalana.

Lo Partit de la Nacion Occitana per la legalizacion de l'occitan e de las autras lengas de França

Pendent los darrièrs meses los Conselhs municipals de las comunas Nòrd-catalanas d'Elna, Tererac, Els Banys i Palaldà, Sant Andreu de Sureda e Portvendres an democraticament pres de deliberacions per tal de modificar e completar lor reglament interior. I an ajustat la possibilitat pels elegits de s'exprimir e de presentar de deliberacions en lenga catalana. Aiçò, tanplan a l'escrich coma a l'oral, amb pasmens una traduccion sistematica en francés per la bona compreneson dels que parlan pas catalan e per trucar pas la susceptibilitat del poder colonial. Aquò a pas sufit. Lo prefècte dels Pirenèus Orientals, s'apiejant sustot sus l'article 2 de la Constitucion de la Vena Republica que dispausa que la lenga de la Republica es lo francés, a sasit lo tribunal administratiu de Montpelhièr per contestar la legalitat de debatre en catalan pendent las reünions dels Conselhs municipals.

Los cònsols màgers de las comunas concernidas son donc estat assignats davant lo tribunal administratiu lo 18 d'abril darrièr. Lo jutjament ven d'èsser rendut aquel 9 de mai. Verdicte : se fondant sus la primautat del francés inscrich dins la constitucion, lo tribunal balha – sens suspresa dins un Estat etnocidaire – rason al prefècte. La lenga catalana, coma totas las lengas de las nacions temporàriament somesas a l'Estat francés, es donc declarada illegala en conselh municipal. Los drechs umans mai elementaris son un còp de mai escarnits al país de la monarquia republicana e del 49-3.

Los elegits catalans concernits van contunhar lor accion en justícia al nivèl europèu. S'aquò risca pauc d'abotir judiciàriament, aquò permetrà almens de sensibilizar politicament l'opinion europèa sus l'opression patida per sas nacions sens Estat.

Lo Partit de la Nacion Occitana milita per l'oficializacion sus lor territòri istoric de las lengas de las nacions inclusas provisòriament dins l'Estat francés. Dins l'immediat es solidari de la resisténcia dels cònsols màgers nòrd-catalans e convida totes los Conselhs municipals d'Occitània a modificar lor reglament interior per tal de permetre a lors elegits de deliberar en occitan s'o desiran. Lo movement d'insomission municipala partit de Catalonha Nòrd deu far taca d'òli. Non se pòt concebre de democracia en Euròpa sens autodeterminacion dels pòbles que la compausan.

Lo Partit de la Nacion Occitana, mai de 2023