A la debuta del mes de març de 2026 lo Partit de la Nacion Occitana (PNO) tornava sus l'operacion menada pels Estats Units e Israèl contra Iran.
Lo PNO e los eveniments en Iran
Après de negociacions nuclearas infructuosas a causa de l'intransigéncia dels negociadors iranians, lo president american Donald Trump, en conjoncion amb Israèl, ordenèt una operacion militara a granda escala contra lo regim dels mollahs, que contunha encara, sens cercar l'aprovacion del Congrès e de l'ONU, çò qu'auriá estat sens dobte dificil.
Lo « Guida Suprèm », l'ayatòla Ali Khamenei, e d'autres nauts dirigents son estats tuats per de missils israelians. Lo regim se venja en ciblant Israèl, los Estats arabes del Golf e las basas americanas de la region. França e d'autres païses europèus an condemnat aquesta intervencion, en regretant que los esfòrces diplomatics sián pas estats perseguits.
Lo president francés es pas en posicion de donar de leiçons, en doblidant que França donèt asil a l'ayatòla Khomeini, fondator de la Republica Islamica d'Iran, qu'es una republica sonque de nom. Lo regim es una teocracia contrarotlada pels « Gardians de la Revolucion » e l'armada.
Esitèron pas a tirar suls manifestants durant la « revòlta dels 12 jorns », çò que provoquèt de milièrs de victimas, d'emprisonaments massisses e de torturas.
Se cal remembrar un cèrt nombre de faches.
Iran es un empèri multi-etnic ont los Persans son la majoritat e ont las minoritats araba, azeri, balucha, curda e autras son oprimidas.
Dempuèi 1979, Iran es un fogal del terrorisme islamista. Finança, arma e contraròtla Hezbollah en Liban e Hamas dins la benda de Gaza. Sostenèt lo regim sanguinari d'Assad en Siria. Es darrièr d'atacas dins los païses occidentals. Es violentament antiamerican, mas son obsession es de destruire Israèl. A aquesta fin, a desvolopat sas capacitats nuclearas per fabricar de bombas termonuclearas e i a gaireben capitat. Per los Estats Units, es necite d’evitar aquesta proliferacion a tot prètz dins un Orient Mejan qu'es una vertadièra polvera. Quant a Israèl, es una menaça vitala per el a un moment que l'antisemitisme ganha de terren dins lo mond entièr.
Lo Partit de la Nacion Occitana vòl exprimir sa solidaritat amb los Persans e los autres pòbles d'Iran, e tanben amb Israèl, que es estat encara mai pres per cibla dempuèi lo pogròm del 7 d'octobre de 2023 e sa guèrra a Gaza per los islamo-esquèrristas de la LFI e una partida de l'esquèrra e de la drecha de la republica « francesa ».
Aquestes « pècs utils » dels islamistas vòlon far creire a la gent que la Republica Islamica d'Iran es un país democratic e antiimperialista, atacat injustament pels imperialistas americans e los pretenduts sionistas genocidas.
S'interèssan pas a l'opression de las femnas iranianas e als massacres perpetrats pels « Gardians de la Revolucion ».
Lo PNO vòl que l'Iran se desbarasse d'aqueles assassins corromputs amb una assisténcia militara dels Estats Units e d'Israèl, establisca un regim democratic que respècte sas minoritats etnicas, e torne a de relacions pacificas amb Israèl e sos vesins arabs sunnitas sens tròp d'interferéncia dels Estats Units, per que l'Orient Mejan pòsca venir un airal de patz e de prosperitat en luòc d'un fogal de conflicte.
Lo camin es estrech, mas es lo sol.
Lo PNO març de 2026