Lo CIRDÒC comunica : Lo 25 de novembre que ven es organizat a l’Ostal de la Comuna de Narbona (11) lo 3en collòqui regional de l’associacion País Nòstre. L’associacion País Nòstre s’es balhada per amira d’animar lo debat d’idèa a l’entorn dels enjòcs de la lenga e de la cultura occitanas dins la societat actuala. L’associacion organiza en particular un collòqui annadièr sus un tèma grand de l’accion publica.
Après aver tractadas las perspectivas de la reforma territoriala en 2015, puèi questionat lo potencial occitan dins lo desvolopament economic en 2016, l’associacion convida ongan a escambiar e debatre a l’entorn de la question occitana dins los grands enjòcs d’uèi en Region Occitània / Pirenèus-Mediterranèa.
Lo CIRDÒC, coma institucion publica cargada de la salvagarda, de la coneissença e de la promocion de la cultura occitana, presentarà son experiéncia e son agach sus l’evolucion de la plaça de l’occitan dins l’accion publica.