Dins sas nòvas de novembre de 2017 la Chambra d'Òc propausava un article de Giacomo Lombardo sus l'amassada que se tenguèt a Roma lo 22 de novembre de 2017 al subjècte de las minoritats lingüisticas del país.
Lo tornam publicar çai jos en occitan. Nos informa sus las accions menadas aval.
Diversitat lingüistica en Itàlia : un patrimòni europèu.
Après d’ans d’abséncia lo 22/11/2017, a Roma, lo Departament per los Afars Regionals e las Autonomias organizèt un encontre, portava sus las minoritats lingüisticas e sus l’estat d’aplicacion de la lei 482/99.
I aguèt una fòrta participacion d’associacions culturalas que trabalhan sus las dotze lengas tuteladas per la lei.
Èra present per la Region Sardenha l’Assessor als Bens Culturals Giuseppe Dessena (solet representant politic de nivèl regional ; aquestas abséncias ne dis long sus l’atencion reservada al subjècte per las Regions...) e qualques parlamentars (degun piemontés).
L’encontre es estat gestit pel nòu coordinator de l’Ofici V (ofici pels afars juridics, las autonomias localas, las minoritats lingüisticas e la comunicacion) Saverio Lo Russo.
Esperada, e plena de bònas intencions, l’intervencion introductiva de l’onorevòle Gianclaudio Bressa, Sotasecretari a la Presidéncia del Conselh dels Ministres (la partença de l’ex-ministre Costa a pas menat un remplaçament e lo dicastèri es vacant...), disponible a reculhir e examinar las suggestions exprimidas dins las intervencions. Naturalament pauc après se’n va, pres per de causas pus importantas (coma arriba de costuma a cèrts nivèls...).
Demest los temas pus tractats, dins las presentacions dels representants de las associacions los principals son estats :
- la desatrosa gestion (o la non-gestion) de la lei dins las escòlas ;
- l’escandalosa abséncia dins la programacion de la RAI de retrasmissions dins las lengas minoritàrias malgrat l'obligacion portada per la lei ;
- l’absença d’una apròcha dirècta entre lo Ministèri e las associacions dins la gestion de la lei 482/99.
Lo Conselhièr Lo Russo a pres bona nòta de las intervencions en prometent de las transmetre a las autoritats competentas.
Se son de flors floriràn. O nos calrà esperar qualques ans per trobar de nòvas traças d’interès sus la matèria de la part del ministèri ? D'aquel temps las nòstras lengas, patrimòni incalculable de civilizacion e de cultura, arribaràn a subreviure ?
Per la minoritat occitana en mai de los ja citats èra present Giampiero Boschero.
Giacomo Lombardo