Sul site mesopinions.com una peticion ven d'èsser dubèrta per reivindicar l'occitanitat d'Auvèrnhe.
Tèxt de presentacion – Demòras en Auvernha, al nòrd d’un territòri cultural vast que s’apela « Occitània » e, coma de miladas de personas aicí, ne as pas cap de consciença. E mai que ne as segurament pas jamai entendut parlar.
E es plan normal, que nosautres, Auvernhat·da·s, sèm gaireben tot·a·s aculturat·da·s. L’Escòla de la Republica, los libres d’istòria, los mèdias, los politics, la tieuna familha, los tieus amics… pas res t’interpelèt o te questionèt jamai sus aqueste sujeit.
E es plan normal, qu’aquí en Auvernha : pas de plancardas bilingüas a l’entrada o a la sortida de las vilas e los vilatges, pas cap de noms de charreiras o de monument bilingües, pas de representativitat dins los mèdias, pas o pauc d’escòlas e pauc de cors per aprene la nòstra lenga e la nòstra istòria, quite lo drapèl Auvernhat es estranjament mancant dins la region tota… Vivèm dins un voeide cultural absolut…
Pasmens tot es pas encara fach ! À nos, Auvernhat·da·s, d’aquí o d’endacòm mai, d’exigir que los nòstres politics e institucions diversas se sasisson d’aquesta problèma d’aculturacion. La diversitat, l’istòria e lo patrimòni immaterial son en gròs dangèir !
Aquel engatjament es pas una barradura als culturas altras nimai la promocion de valors passadistas e retrogradas. Pas de plaça dins aquel combat per tota forma de racisme, de sexisme o de sabèm pas quina fòbia. Pas res a véser amb un replec identitari pudent quin que siá. Al contrari, la cultura occitana es duberta sul mond e suls altres dempuèi totjorn.
Mas perqué la nòstra cultura e la nòstra lenga deurián completament se perdre sens deguna resisténcia ? Fòrça causas despareiguèron, mas segurament pas la nòstra memòria nimai la nòstra fiertat. Tot aquò es pas de demorar solament al chapitre folclòre dels libres d’istòria mas deu tornar vivent al pus lèu per las generacions que venon !