Lo 10 de novembre de 2018 se tendrà a Tolosa un acamp organizat per un grop d’elegits e de militants occitanistas. La siá tòca es de preparar las eleccions municipalas de 2020.

Aquí çai jos lo comunicat publicat pels organizators (sorsa Pais-nostre.eu).

Caras amigas, Cars amics.

En 2020 se devon debanar d’eleccions municipalas. Sèm nombroses a pensar que l’occitanisme deu pas èstre absent d’aquel rendètz-vos electoral.

En 2014 foguèt lançat BASTIR. Èra un rassemblament a l’entorn d’unas idèas e d’unas proposicions concretas per dintrar dins de conselhs municipals. De tèxtes serviguèron de basa (un tèxt que se disiá Manifest occitanista e un tèxt que fasiá de proposicions programaticas).

Una organizacion leugièra se metèt en plaça e i aguèt mai d’un centenat de candidats labelizats BASTIR, sus de listas divèrsas.

I aguèt d’elegits e an fait un trabalh qu’es pas de negligir.

Lo 22 de setembre passat a Tolosa, a l’escasença de la Dintrada, un trentenat de personas an discutit de l’interès que i auriá a tornar lançar una crida similara a Bastir per las municipalas que venon.

O vòlon far en prenent un pauc mai de temps que çò que se faguèt en 2014 e en aprofitar l’experiéncia passada.

S’agís pas de crear un partit politic. S'agís simplament, de faiçon pragmatica de far en sòrta que de personas convençudas que l’occitanisme es portaire d’un messatge que fa besonh a nòstres territòris sián presentas sus de listas divèrsas, puèi que sián elegidas dins de conselhs municipals per metre en plaça de projèctes concrets.

Volèm tirar las leçons de 2014 e prendre lo temps de crear una vertadièra coordinacion que permetrà una preséncia visibla e eficaça de l’occitanisme per las municipalas venentas.

Nos acamparem lo 10 de novembre a Tolosa a la Sala Nelli de l’Ostal d’Occitània, 11 carrièra Malcosinat, amb un òrdre del jorn que serà aqueste :

  1. Bilanç de l’experiéncia Bastir 2014. Çò que foncionèt e çò que foncionèt pas ?
  2. Lo Manifèst occitanista : tojorn d’actualitat ? Quina modificacions ? Quina actualizacion ?
  3. Organizacion per 2020. Nom : Bastir ? Site internet. Mesa en plaça d’una coordinacion. Mejans financièrs.

Un grop d’elegits e de militants occitanistas.