En seguida de decisions presas recentament pel Ministèri de l'Educaion Nacionala, Nicolau Rei-Bèthvéder president del CREO Tolosa apela a manifestar per la defensa de l'ensenhament de la lenga occitana.

Manifestacion contra l’assassinat de l’occitan a Tolosa

Deman, dimècres 30 de genièr, a 14h30, al Rectorat de Tolosa, los defensors de l’ensenhament de l’occitan cridaràn lor colèra.

Ièr, lo Centre Regional dels Ensenhaires d’Occitan de l’acadèmia de Tolosa (CREO Tolosa) rendèt publica la fin de la dotacion especifica que finança l’occitan dins los collègis e licèus. Ara ven l’ora de la mobilizacion generala per salvar un dels darrièrs bastions de l’ensenhament de l’occitan amb gaireben 15 000 escolans que benefícian d’entre 1 e 3 oras d’occitan per setmana. I a tanben un cinquantenat d’ensenhaires d’occitan dins l’acadèmia mondina.

La terribla novèla es pas encara coneguda dins totes los establiments, mas cal saber que la logica de liquidacion generala de l’occitan es en camin pertot. Dins las acadèmias de Lemòtges, Clarmont e Grenòble, l’occitan dins los licèus e collègis es anecdotic. A Montpelhièr e Ais, l’occitan a fòrça reculat davant las atacas dels diferents rectors. Lo 60 % dels escolans del segondari es dins l’acadèmia de Tolosa. L’occitan es tanben fòrt a Niça, mas patís fòrça la reforma mortifèra dels licèus.

Lo CREO Tolosa viu tanben mal las messorgas que li faguèt la rectritz lo 21 de decembre de 2018, quand parlèt de « sanctuarizacion » de l’occitan dins l’acadèmia.

Lo CREO Tolosa apèla donc totes los que son estacats a la lenga d’òc a manifestar davant lo Rectorat de Tolosa, 75 Carrièra St Ròc, a 14h30, dimècres 30 de genièr de 2019. Drapèls, bandeiròlas, pancartas e tot çò que fa de rambalh son benvenguts. Cal venir nombroses per mostrar que l’occitan existís e vòl encara viure longtemps.

La luta que s’anóncia es essenciala, la cal pas mancar.

Pas de lenga sens ensenhament.

Pas d’Occitània sens l’occitan.

Nicolau Rei-Bèthvéder
president del CREO Tolosa
(Sorsa : Jornalet.com)