Lo 1, 2 e 3 de julhet de 2016 se debanèt a Castelnau d'Arri lo forum euròregional « Patrimòni e Creacion ». Aquí çai-jos la presentacion que ne fasián los organizators.
Presentacion del forum
Lo projècte de forum « Patrimòni e Creacion » repausa sus una cooperacion entre d’actors culturals de las regions Lengadòc Rosselhon Miègjorn Pirenèus, Catalonha e Balearas, a l’entorn d’una enveja mutuala de descobèrta e de desvolopament de la cultura sieuna e de la cultura de l’autre, aquel vesin tant pròche e pertant de còps tant longanh, mas tanben de sa lenga. L’occitan, lo catalan, constituïsson lo fondament d’un eretatge partatjat e d’una identitat comuna a totes los estatjants d’aqueste espaci.
L’encastre euròregional apareis uèi coma lo juste escalon, articulant local e transnacional, per tornar balhar una visibilitat a la creacion culturala especifica de l’espaci occitanò-catalan, permetre l’escambi e la descobèrta, en anant totjorn al rescontre de publics en quista d’elements per noirrir aquestas identitas partatjadas e de còps mal percebudas.
Lo Forum s’articularà doncas a l’entorn de grands axes tematics, explorant plan largament l’ensemble del camp cultural occitanò-catalan (patrimòni cultural immaterial, musicas actualas, teatre, numeric, creacion audiòvisuala, literatura...) eles meteisses declinats en cicles de conferéncias, de taulas redondas, de talhièrs, animats per de professionals de cada sector.
Una programacion pluridisciplinària facha de concèrts, representacions teatralas, projeccions, caminaments, arts populars, amb una atencion particulara portada al public jove, vendrà ritmar los moments fòrts de l’eveniment, aital integrat al dispositiu Total Festum de la region Lengadòc Rossellhon Miègjorn Pirenèus.
Lo Forum Euròregional « Patrimòni e Creacion » se debanarà a Castelnau d’Arri (Aude), una ciutat idealament plaçada al dintre de l’Euròregion coma de la nòva Region, dotada d’un patrimòni ric, valorisat del temps de l’eveniment, e d’infrastructuras necessàrias al bon anar d’aquela manifestacion inedicha.
Aquel eveniment es lo compliment d’un projècte lançat en 2014 entre d’actors culturals de referéncia de lors territòris respectius, a las accions e domènis d’expertisa complementaris, ja en partida concretizat d’un caire e de l’autre amb de fruchoses escambis professionals e artistics, e permetrà d’aviar de perspectivas d’avenidor comun, d’entamenar de futuras estructuracions, de lançar un mercat de la creacion, de desvolopar los publics, d’assetar los escambis e la difusion culturala en occitan coma en catalan e aquò a una escala europèa.
Totes los actors culturals de l’espaci euròregional, d’Occitània mai de Catalonha, son doncas convidats del 1ièr al 3 de julhet de 2016 a Castelnau d’Arri.