Tre lo dissabte 5 de setembre de 2020 en accòrd amb la promessa de candidat Michaël Delafosse, elegit en junh conse de la vila, los transpòrts public se podràn prene a gratis per tota la metropòli de Montpelhièr.
La decision s'aplicarà pel moment sonque la dimenjada a bòrd dels tramvais e dels buses.
La majoritat del municipi novelament elegit vòl, aquò fasent, promòure la transicion ecologica. Aquela decision, encoratja a prene los transpòrts collectius e deuriá limitar la preséncia d'automobilas en vila, fasent mermar las emissions de gaz nociu.
Aquesta decision foguèt tanben pensada d'un punt de vist social : limita las despensas ligadas als desplacaments.
La còla de Michaël Delafosse, indiquèt qu'èra pas, a l'ora d'ara, en mesura d'evaluar exactament lo còst de la mesura.
Lo passatge a la gratuïtat totala, qué que siá los jorns de la setmana, es previst avant lo miègmandat en 2023.