Lo 10 d'octobre de 2020 se debanaràn de manifestacions « per que viscan las lengas nòstras ». Lo PNO (Partit de la Nacion Occitana) crida a las manifestacions.

Lo Partit de la Nacion Occitana crida a las manifestacions del 10 d’octobre de 2020

La lenga es un dels elements màgers de l’identitat d’una nacion. N’es quitament l’element determinant segon nòstre punt de vista etnista. Davant las atacas permanentas de l’Estat colonial francés per far desaparéisser l’esséncia de la nacion occitana, e fauta d’un combat mai radical, lo Partit de la Nacion Occitana sosten sens reserva las accions del collectiu Pour que vivent nos langues / Per que viscan nòstras lengas. Lo PNO a totjorn sostengut las accions menadas pels sindicats, associacions professionalas o de parents d’escolans que se batan per l’ensenhament de la lenga occitana e contunharà d’o far.

Contra la darrièra reforma del licèu de l’educacion nacionala francesa que redusís drasticament l’ensenhament ja plan insufisent de la lenga occitana obtengut après de decènnis de luchas, lo Partit de la Nacion Occitana demanda a sos sòcis e simpatisants de participar a las manifestacions que son organizadas lo 10 d’octobre de 2020 un pauc de pertot dins lo país. D’uèi, probablament mai que jamai e malgrat las dificultats del combat, es util de remembrar als poders e partits jacobins que nos daissarem pas tòrser sens resistir.

Alavetz, lo PNO convida totas las Occitanas e totes los Occitans a luchar dins l’unitat per la defensa de nòstra identitat menaçada. Mentretant rebremba que lo combat per la lenga es pas solament un combat cultural mas es un combat politic e que sens poder politic occitan independent, l’Estat francés seguirà sa politica lingüistica d’eradicacion de l’occitan e, levat lo francés, de las autras lengas de França.

Per la liberacion d’Occitània, cal un engatjament politic, alavetz, per la lenga e per la nacion, totes e totas mobilizats, sens illusions mas amb determinacion, lo 10 d’octobre de 2020 !

Partit de la Nacion Occitana lo 23/09/2020