Lo dijòus 8 d'avril de 2021 l'Assemblada Nacionala francesa adoptava la proposicion de lei del deputat Paul Molac. En seguida lo Partit de la Nacion Occitana comunicava.
Lei Molac : una victòria per totes los promotors de las lengas de França
Lo Partit de la Nacion Occitana se regaudís del vòte definitiu per l’Assemblada Nacionala francesa de la lei Molac (deputat breton del grop Libertats e Territòris) relativa a la proteccion patrimoniala de las lengas regionalas e a lor promocion.
Los deputats l’an adoptada a una larga majoritat (247 voses per, 76 contra). Lor vòte confòrme amb lo del Senat rend definitiu lo tèxt de lei.
Aquel vòte positiu foguèt obtengut malgrat l’oposicion del govèrn e subretot del ministre de l’Educacion Nacionala, Jean-Michel Blanquer, un ferotge jacobin.
La lei fasiá partida de las promessas de campanha non tengudas del president de la republica.
Lo Partit de la Nacion Occitana remarca que lo govèrn francés a beneficiat sens suspresa del sosten incondicional dels dos extrèms del pòl politic a l’Assemblada : lo Recampament Nacional d’extrèma drecha e La França Insomesa que an en comun lor chovinisme francés e lor ostilitat a las lengas regionalas.
Ara, cal que la lei siá promulgada lo mai lèu possible e que lo govèrn francés longanheje pas.
Aquò supausa que l’Educacion nacionala augmente de manièra significativa lo nombre ridiculament bas de pòstes per las lengas regionalas als concorses de recrutament dels professors per acarar la demanda.
Es un grand jorn per las lengas dichas regionalas que seriá mai just d’apelar lengas de França.
Dins l’ensenhament public, la lei Molac prevei d’autorizar l’ensenhament per immersion de las lengas regionalas, çò que l’Educacion nacionala aviá totjorn refusat.
La lei Molac instaura tanben un prètzfach escolar obligatòri al benefici de las escòlas associativas coma las Calandretas en Occitània.
Aquò vòl dire que las comunas de residéncia dels escolans deuràn versar una contribucion als establiments d’acuèlh.
La lei Molac prevei la possibilitat d’establir de convencions entre l’Estat e las regions per l’ensenhament de las lengas dichas regionalas.
La lenga regionala serà ensenhada de manièra facultativa dins l’encastre de l’orari normal de las escòlas mairalas e elementàrias, dels collègis e dels licèus.
La demanda sociala, minimizada per l’Educacion nacionala, es en realitat, fòrta. Nos anam mainar d’aquò.
Per lo Partit de la Nacion Occitana, aquela lei es un primièr pas important cap al respècte de la diversitat lingüistica dins la republica francesa, tant presada e promoguda per França e la francofonia dins las instàncias internacionalas mas inexistenta sus son territòri segon lo principi plan conegut : fasètz çò que vos disi e fasètz pas çò que fau.
L’estapa seguenta es l’oficializacion de las lengas de França sul territòri entièr de la republica francesa.
Lo PNO (08/04/2021)