Lo 17 de genièr de 2022 sus son site lo Partit Occitan presentava sos vòts per 2022. Visiblament sos membres semblan d'aver pres consciéncia dels problèmas que an al nivèl de la comunicacion e se prometan de la melhorar.

Vòts per 2022 del Partit Occitan

Caras amigas, cars amics del POC e d’endacòm mai,

Per seguir la tradicion, es lo temps dels escambis de vòts los mai cars per l’annada venenta. Passar lo cap de l’an es tant un moment de balanç coma de projècte.

Primièr fasèm un balanç a la lèsta de 2021 que s’acaba en nos balhant de bons moments e d’autres cossi-cossa. Demest los bons, gardam aquel que nos a mobilizats al entorn de la participacion dirècta de la lista regionalista autonòma Òc per Provença ! a las elections regionalas 2021. Remembram-nos que la lista a pogut existir de mercés a totas e totes venguts del mond cultural e associatiu qu’an fach fisança e se son engatjats al costat de militants eles-meteisses eissuts de formacions diferentas.

Amassa avèm pogut propausar una vista de çò qu’esperam de la democracia e de la vida comuna sus los territòris nòstres.

Amassa avèm afirmat tornarmai que la politica èra indispensable e portava sa pàrt de noblesa, puèi que d’autres mòdes e sistèmas de pensada existissián e podián far bolegar las societats. Aquesta experiéncia reculhiguèt sufragis tras nos espèras [sic] malgrat l’ostracisme que ne sèm estats victimas venent dels mèdias audios d'escota bèla particularament France 3.

Demest los bons moments del POC 2021 retenèm tanben la Dintrada 2021 de Narbona que confirmèt las decisions presas per la federacion R&PS durant la sequéncia de l’Universitat d’Estiu 2021 a Tolon, qu’èran doas capitadas. De saber : participacion activa a la fasa de las eleccions, e mesa en prioritat de las legislativas de 2022.

Lo Partit Occitan es plan viu e pòrta una volontat reala de desvolopament. Lo nonrés sideral de la vida politica d’uèi presentada nos agulhona de l’analisar melhor, de proposar mai, inventar, motivar e convéncer. Per aquò la discussion, la pedagogia, lo consensus e l’esperit de conquista son las solas aisinas qu’avèm. Los marges de progression son enòrmes mème se avèm d’aprendre de nosautres meteisses encara fòrça. Lo mond coma va espèra un orizont novèl, una renaissença ont devèm prendre nòstra part, ont nòstra plaça es deguda.

Los votz [sic per vòts] que fasèm qu’exprimissèm per lo POC en 2022 :

  • Motivar 50 canditats dels territòris occitans per partejar la vision de la Ciutat e d’una Democracia viva ;
  • Nos mobilizar per mandar a París al mens dos elegits·idas de l’espandi occitan amb l’ambicion d’encontrar lo grop Libertés & Territoires que portèt subjèctes majors coma la lei Molac ;
  • Precisar/pelfinar nòstre programa en lo botant vesedor ;
  • Assegurar nòstra preséncia sus los malhums socials en particular aqueles presats per los joves que son los ciutadans de deman ;
  • Melhorar nos relacions amb la premsa e en particular los France 3 e France Bleu del territòri per nos fa conéisser melhor e aital sortir de l’anonimat.

Lo Partit Occitan