Lo 27 de genièr de 2023 lo PNO (Partit de al Nacion Occitana) comunicava.
Christian Teyssèdre, cònsol màger de Rodés, vòl tuar l'Estivada ; s'aquò es pas ja fach !
Res es pas encara definitivament arrestat, mas la situacion e l'avenidor del festenal occitan inter-regional l'Estivada son mai que jamai compromeses. Es lo quotidian Centre Presse dins son edicion avaironesa del dijòus 26 de genièr de 2023, que, jos la pluma de Matieu Roualdès, o nos ditz. Aquel jornalista, professional seriós e generalament fòrça plan informat, dins son article entitolat « Per aqueste estiu la vila e Rodés vòl veire fòrça mai grand que l'Estivada » nos infòrma que la comuna de Rodés anóncia qu'organizarà, en associacion amb France Télévisions, tres seradas de concèrts a la fin de julhet amb « de caps d'aficha de reputacion màger ». Plan solide, e es probablament pas un azard, es en la fin de julhet que cada an es programada l'Estivada. Aquesta se debanant atanben sus tres jorns après que M. Teyssèdre aja decidit de l'amputar d'una jornada vaquí qualques annadas.
Refusant de comprene qué que siá de la cultura occitana e amirant pas que la notorietat de sa vila, lo cònsol màger de Rodés sómia d'un festenal grand, equivalent al Pause Guitarre d’Albi, al Garorock de Marmanda, al Printemps de Bourges, a las Francofolies de La Rochèla o a las Vieilles charrues de Caraez en Bretanha. Diguèt voler « passar a quicòm mai ». Quicòm que, plan solide, aurà pas mai res a veire amb l'objectiu inicial del festenal qu'èra la promocion de la scèna e de la cultura occitanas dins planes de sos aspèctes. Al nom de l'eficacitat mediatica, Sr. Teyssèdre refusa de far l'esfòrç d'ajudar la cultura occitana. En plaça d'ensajar de la relevar en la promocionant, çò qu'es la tòca iniciala de l'Estivada, lo cònsol màger de Rodés li vòl portar lo còp de gràcia. En plaça de multiplicar los esfòrces per far conéisser lo festenal al delà de las frontièras de Roergue, preferís despensar lo doble d'argent al servici de vedetas internacionalas.
La causa èra venguda previsibla perque, annada après annada, lo desinterès de la municipalitat de Rodés per son festenal èra de mai en mai patent. Tot èra fach per far l'Estivada la mens visibla possibla, la mens atractiva possibla, probablament en vista de son abandon programat per M. Teyssèdre e sos lòctenents. A tal ponch que Matieu Roualdès nos informa que l'Estivada a quitament desaparegut del budgèt principal 2023, adoptat en conselh municipal. Alavetz que compta de far lo cònsol màger ? L'Estivada es a desaparéisser ? Cristian Teyssèdre a la responsa. Promet « Un festenal novèl non pas per d'unes, mas pel public grand ». Cadun apreciarà lo mesprètz del cònsol màger pels festivalièrs amators de musicas occitanas qu'an pas mai drech d'accès a lor cultura.
Notam un còp encara que se lo public respondiá de mens en mens nombrós a Rodés al moment de l'Estivada es plan per una manca averada de publicitat al nivèl exagonal. L'autocrata Cristian Teyssèdre a la foliá de las grandors. Vòl a tot pèrdre per Rodés « Quicòm de jamai vist aicí ! ». Pels tres concèrts de julhet vòl de caps d'aficha de granda reputacion que, plan solide, cantan pas en occitan e reivindican pas de far de musica occitana.
Segon lo jornalista Matieu Roualdès « Lo nom del festenal poiriá èsser conservat. Mas son contengut auriá pas mai grand causa a veire amb son passat. La Vila desira s'afranquir del costat occitanista e s'ofrir un festenal de renom ». E mai se res es pas encara definitivament arrestat (ça que la lo programa 2023 deuriá èsser ja alestit) aquò sembla plan a un arrèst de mòrt per l'Estivada, darrièra grand veirina de la scèna occitana.
Lo Partit de la Nacion Occitana denóncia tras que fòrt l'irresponsabilitat de la comuna de Rodés, mas egalament la de totas las collectivitats territorialas (Conselhs departamentals e regionals) d'Occitània qu'an, pauc a cha pauc, abandonat l'Estivada a sa pròpria sòrt. Los militants benevòls an totjorn pres lor part de trabalh, mas es a las collectivitats territorialas de prene en carga lo festenal occitan inter-regional l'Estivada. Res es pas encara perdut per l'avenidor, lo Partit de la Nacion Occitana demanda als poders politics de se tornar reprene e de promocionar, coma se deu, la cultura originala de lor territòri, valent a dire la cultura occitana.
Lo PNO, genièr de 2023