Al mes de genièr de 2023 lo Partit Occitan comunicava sus sa posicion rapòrt a la reforma de lei sus las retiradas en cors de discucion en França.

Comunicat al subjècte del projècte de reforma del sistèma de las retiradas

Lo Partit Occitan s’opausa al projècte de reforma del sistèma de las retiradas e sosten lo movement de mobilizacion que pren d'amplor, dont l’intersindicala, que demanda son retirament. Sostenèm nòstres elegits de Regions e Pòbles Solidaris aital coma l'ensemble del grop parlamentari, Libertats, Independents, Otramar e Terrritòris (LIOT) que s'opausaràn al projècte de lei pendent los debats dins l'Assemblada Nacionala !

Es evident ara qu’aquel projècte, bandat de non-diches e de trapèlas, e que relèva del bricolatge, es prigondament injust. Sens caractèr d’urgéncia, es a una remesa a planièr complèta del sistèma de las retiradas que se cal atelar en comptant sus l’intelligéncia collectiva. L’esquèma productiviste qu’es a la basa del sistèma actual es despassat de cap al desreglament climatic e als imperatius de sobrietat que nos obligan.

« Sens planeta, pas de retirada ! », vaquí l’eslogan qu’esclaira lo camin de seguir.

Penibilitat, carrièras capoladas, tempses parcials, pichonas remuneracions, inegalitats òme/femnas, devon èsser compensats pels riquissims que son l’anomalia del sègle, per las carrièras confortablas e plan remuneradas de las e los que pòdon trabalhar sens limits d’edat, per la qualitat e lo redesplegament d’emplecs dont mancam crudèlament.

La propaganda governamentala, de còps sens far cas de las leis en matèria de mèdias, fa fi de la mobilizacion massisa dels ciutadans, entre un a dos milions de manifestants, lo 19 de genièr darrièr. E coma explicar, dins lo meteis temps, lo projècte de doblament del budgèt de l’armada (vòte previst a la prima egalament), çò qu’afectariá fòrça mai las finanças publicas ?

Lo subjècte de las retiradas deuriá èsser al còr d’un novèl pacte social e societal, un sistèma clar, transparent, comprensible, adaptat a caduna e cadun, ont la cooperacion remplaçariá la competicion, vaquí çò que nos esperam en plaça d’aquel bidouillage vergonhós.

Mancam pas aquela escasença de pensar e d’esclairar nòstres endemans. Prenèm lo temps perque avèm léser.

Lo Partit Occitan
Genièr de 2023