A la fin del mes de genièr de 2024 los agricultors manifestavan. Lo Partit de la Nacion Occitana lo 21 de genièr comunicava sul subjècte.
Lo Partit de la Nacion Occitana sosten los agricultors en lucha
Un pauc de pertot dins l'Estat francés, mas principalament en Occitània, la quala Occitània se limita pas a la region « Occitània-Pirenèus-Mediterranèa », los agricultors manifèstan.
Patisson una inflacion galaupanta, de prèses d'engraisses plan nauts e de prèses de venda en baissa suls mercats mondials, çò que demesís lors revenguts ja febles e met en question la sobeiranetat alimentària.
D'un autre costat, s'inquietan de la PAC, del Pacte Vert europèu dont l'aplicacion seriá responsabla de novèlas constrenchas environamentalas, d'un accès a l'aiga vengut mai dificil e de la supression de « l’avantatge fiscal » sul GNR (gazole non rotièr).
Pel Partit de la Nacion Occitana, lo vertadièr responsable d'aquelas dificultats es puslèu l'Estat francés, ultra-centralizat, que retarda los versaments de las ajudas de la PAC, ajusta sos pròpris reglaments constrenhents a las orientacions europèas, e fixa e percep las taxas sul GNR.
Lo Partit de la Nacion Occitana compren las preocupacions dels agricultors occitans e sosten lors revindicacions.
Crida a manifestar, pacificament, a lor costat amb de bandièras occitanas, en particular a Agen (Òlt e Garona) lo diluns 22 de genièr a 14 oras al giratòri de Camelat a rasis de Colairac Sent Circ.
Lo Partit de la Nacion Occitana rampèla que los problèmas a los quals los agricultors son confrontats dins los 31 departaments occitans, dont dotze dins la region « Occitània-Pirenèus-Mediterranèa », e un vintenat dins las tres regions vesinas, trobarián mai aisidament una solucion s'aquelas regions occitanas èran autonòmas e dispausavan de competéncias reglamentàrias, legislativas e fiscalas e dels mejans per conduire de politicas de desvolopament, valorizant las produccions de nòstres territòris e las competéncias dels trabalhadors.
Per l'agricultura, que deu èsser un ponch fòrt de nòstra economia, lo Partit de la Nacion Occitana preconiza mai que mai la proteccion e la promocion de las produccions de qualitat, a l'internacional coma en « circuit brac ».
Lo poder local autonòm es sol capable de respondre, sens dogmatisme ecologista ni priori euro-sceptic, a las necessitats entrainadas per la transicion ecologica.
Lo PNO, 21/01/2024