Lo 16 de febrièr de 2024 lo mond apreniá la mòrt d'Alexei Navalni Qualques jorns pus tard lo Partit Occitan (POC) comunicava sus l'eveniment, fasen lo parallèl amb la situacion de Julian Assange.
Navalny, Assange : la libertat d’expression es un ben preciós
La democracia dins lo mond es malauta. L’assassinat d’un opausant pòt pas èstre un metòde per governar. Empresonar aquel que denóncia de messorgas d’Estat se pòt pas justificar tanpauc.
Nòstre mond coneis per aquestes jorns dos eveniments que mòstran la ncessitat d’aparar per totes los mejans possibles lo dret a la libertat d’expression de las opinions e de las idèas.
Primièr i a l’assassinat dins de circonstàncias que son pas encara esclaridas d’Alexei Navalni. Aqueste opausant a Vladimir Potin a pagat per sa vida son ponhastrèr a denonciar la dictatura del president rus.
Un crimi inacceptable
Los metòdes emplegats pel poder rus daissan pas cap de dobte sus qual e perqué A. Navalni, prèmi Sakharov europèu per la libertat de pensada en 2021, foguèt assassinat dins la preson ont l’avián embarrat per « extremisme », segon l’inquietanta terminologia juridica russa.
Es pas acceptable e la mòrt d’ A. Navalni ven alongar la lista ja tròp longa dels crimis de V. Potin e de son entorn contra los que pensan pas coma eles. L’assassinat es ara un biais de governar pels dirigents de Russia.
Cal per aquò considerar que la libertat d’expression es melhor protegida dins d’autres païses ?
En fugida per aver dit la vertat
Podèm pas daissar de pensar a la situacion de Julian Assange e a la destinada que serà sieuna s’es mandat dins las jaulas americanas. Aqueste luta dempuèi d’annadas per tornar trobar sa libertat.
Es menaçat de passar sa vida en preson, donc es menaçat de i morir lentament, per aver desvelat l’existéncia de documents que pròvan que, al nivèl mai naut del poder als Estats Units, mentiguèron, manipulèron la vertat per justificar una guèrra de las intervencions militaras murtrièras.
La defensa de la libertat d’expression deu èstre la meteissa dins totas las circonstàncias ; es per aquesta rason que lo Partit Occitan saluda la memòria d’A. Navalni e demanda la liberacion de Julian Assange e de totas las personas empresonadas uèi per lors idèas.
Lo Partit Occitan (febrièr de 2024)