Sus l'Esquèma Regional de desvolopament de l’occitan [ligam] - un article de la region Miègjorn-Pirenèus - site midipyrenees.fr

"La Region Miègjorn-Pirenèus ajuda dempuèi bèl brieu las accions de las associacions e estructuras de promocion de la lenga e de la cultura occitanas. A notadament multiplicat son budgèt per mai d’1,5 dempuèi 1998 per tal d’obrar a la transmission de l’occitan, lenga e cultura pròpias e vivas de Miègjorn-Pirenèus.

"Aquel procediment ten compte de la situacion e dels atots especifics de la nòstra region, de sa vocacion de dobèrtura euro-regionala e europenca, de sa volontat d’afortir e de desvolopar una personalitat singulara e dobèrta, de sa desirança de promòure una part integranta del patrimòni regional, nacional e mondial.

"Una etapa novèla per l’occitan

"Fin de 2005, la Region comandèt un rapòrt sus « los enjocs de la lenga e de la cultura occitanas dins l’encastre de las relacions interregionalas e euro-regionalas » que concluguèt al potencial fòrt de devolopament de la lenga e de la cultura occitanas dins la nòstra region, mercés notadament al "sector associatiu, a l’ora d’ara fèr de lança d’aquela vida culturala".

"Conformament a aquelas recomandacions, la Region Miègjorn-Pirenèus a elaborat un Esquèma regional de Desvolopament de l’Occitan que foguèt aprobat lo 20 de decembre de 2007.

"Se tracta per la Region de passar a una etapa novèla de promocion de l’occitan, pel biais d’una planificacion sul periòde 2008 - 2013 e d’una racionalisacion de l’intervencion regionala, dobèrta d’un punt de vista inter e euroregional.

"La Region que desira tanben convidar au caminament l’Estat, los ueit Conselhs Generaus de Mieijorn-Pirenèus, las estructuras intercomunaus (comunautats de comunas et d’aglomeracion, paises, parcs naturaus regionaus) motivadas per lo sosteng e lo desvolopament de la lenga e de la cultura occitanas tanvau las autas Regions d’Occitània, notablament las qui son egaument en cors de definicion d’ua politica culturau pluriannau de desvolopament de l’occitan (Aquitània e Lengadòc-Rosselhon) entà notablament desvolopar sinergias de projèctes e de mejans.

"Diversitat linguistica e culturala

"La diversitat lingüistica e culturala dins lo mond es un enjòc màger per las annadas venentas.

"La convencion sus la proteccion e la promocion de la diversitat de las expressions culturalas de l’UNESCO, adoptada a l’unanimitat lo 20 d’octòbre de 2005, dintrada en aplicacion lo 18 de març de 2007, precisa que la diversitat culturala deu èsser considerada coma un "patrimòni comun de l’umanitat" e sa "defensa coma un imperatiu etic, inseparable del respècte de la dignitat de la persona umana".

"Aquel tèxt que foguèt ratificat per França, tòrna afortir lo dreit sobeiran dels Estats d’elaborar de las politicas culturalas en vista de "aparar e promòure la diversitat de las expressions culturalas", d’un costat, e de "crear las condicions que permeton a las culturas de s’espandir e d’interagir liurament de tal biais que s’enriquiscan mutualament", d’autra part. Precisa que "La diversitat lingüistica es un element fondamental de la diversitat culturala."

"La lenga occitana es classificada a l’ora dara per l’UNESCO demest las lengas "en dangièr seriós d’extinccion", aquò deu apelar una politica volontarista de salvagarda e de desvolopament de la part de las diferentas collectivitats territorialas tocadas e de l’Estat."