Conselh Regional de Miègjorn-Pirenèus - amassada del 20-12-2011
Vòt de Guilhem Latrubesse - Elegit Europe Ecologie
"Per la proteccion e la promocion de las lengas e culturas regionalas.
"La diversitat lingüistica e culturala dins lo monde es un enjòc màger per las annadas que venon. En França, las lengas regionalas e en particular l'occitan fan partida de las lengas menaçadas segon l'UNESCO. Aquò deu apelar una politica volontarista de sauvagarda e de desvolopament de la lenga e de la cultura occitanas e d'accions menadas en partenariat amb las diferentas collectivitats e l'Estat.
"França a signat la Convencion sus la proteccion e la promocion de la diversitat de las expressions culturalas atal coma la Convencion sus la sauvagarda del patrimòni immaterial de l'umanitat. De mei, la lei constitucionala deu 23 de julhèt 2008 de modernisacion de las institucions de la Vau republica a adobat dens la Constitucion un articla 75-1 que ditz que “las lengas regionalas fan partida del patrimòni de França”. La preséncia d’aquel article au miei del títol consacrat a las collectivitats territorialas los balha tota la legitimitat per la promocion, lo desvelopament e l’estructuracion de las lengas regionalas en ligason amb l’Estat.
"La politica regionala de Miègjorn-Pirenèus en favor de l’occitan s’apièja sus :
- un esquèma regional de desvelopament de l’occitan sus lo periode 2008-2013, adoptat lo 20 de decembre 2007,
- una Amassada, conselh de desvelopament de l’occitan en Miègjorn-Pirenèus, instància partenariala entre actors publics (Estat, collectivitats) et privadas, creada en 2009,
- una convencion cadre de partenariat amb lo Rectorat e la DRAAF, sus lo periode 2009-2015,
signada lo 1er de decembre 2009.
"Tanben, Mieidia-Pirenèus dab d’autas regions de l’espaci occitan, qu’a validat la Carta de cooperacion interregionala e transfronterrenca de desvelopament de la lenga occitan o lenga d’oc. Las collectivitats regionalas, signataris d’aquera carta, que volen uei lo dia s’associa entà definir e har amassa ua navèra politica partenariala per la lenga e la cultura occitana.
"S'agís uèi de de passar a una novèla etapa e de permetre a tot ciutadan que o desira de practicar las lengas regionalas, de conéisser las culturas que las veïculan e de participar a lor transmission :
- en ofrissent una melhora plaça de la lenga e de la cultura d'Òc dins los mèdias,
- en encorajant mai la creacion literària, teatrala, musicala e cinematografica en lenga d'Òc.
- en desvolopant los ensenhaments de l'occitan e en occitan per una politica d'ofèrta generalizada,
- enfin, en desvolopant la preséncia de l'occitan dins la vita publica (senhalizacion, usatge de la lenga)
"Per aquò, lo Conselh Regional Miègjorn-Pirenèus s'associa a la crida "Anem ! per la lenga occitana" e demanda a l'Estat una lei de proteccion e de promocion de las lengas e culturas regionalas de França atal coma las adaptacions juridicas necessàrias, per marcar lor reconeissença e lor presa en compte dins la societat de uèi."