Genièr de 2014, lo Conselh general d'Avairon comunica. Sorsa : Le magazine du Conseil Général de l'Aveyron) :
L'occitan convencionat :
Pendent qualques annadas, los partenaris de l’Educacion nacionala en carga de l’accion culturala per l’occitan se son remosats al rectorat dins l’encastre del Conselh academic per l’ensenhament de l’occitan (C.A.E.Oc.). Lo Conselh general d’Avairon i es estat representat per Simona Anglada e son cargat de mission per l’occitan, C.-P. Bedèl. Aqueles rescontres se son concretizats per una convencion de desvolopament de l’occitan entre la Region, lo rectorat e los departaments interessats.
Lo Conselh general ven de signar aquela convencion amb la volontat d’orientar l’accion de sos servicis en direccion del public escolari e de la valorizacion de l’occitan dins la societat : sinhaletica, vida publica e culturala... Tre ara, los tres servicis associats del Conselh general van èsser remosats dins una estructura comuna per mai d’eficacitat. Pel moment, es lo creator del servici occitan a la Mission departamentala de la cultura qu’es lo director de l’Associacion pel desvolopament e la transmission de l’occitan en Avairon (A.D.Oc.12), que trabalha dins las escòlas, e qu’es tanben lo director de l’Institut occitan d’Avairon – al canton (I.O.A.). A començat son trabalh de mesa a dispausicion de las escòlas de sas produccions sus la memòria occitana d’Avairon. Un partenariat renforçat amb lo Musèu de Roergue, la Bibliotèca departamentala de prèst (B.D.P.) e l’Ostal Joan Bodon deuriá participar al desvolopament de l’ensenhament e de la socializacion de l’occitan en Avairon.