03/06/15 - Fin de l'accion de David Grosclaude après l'anóncia per l'estat francés de la creacion de l'Ofici Public de la Lenga Occitana :
"Que soi urós d’anonciar a tots los qui m’an sostienut desempuish ua setmana qu’an ganhat ua victòria. Lo document qui demandavi desempuish lo 27 de mai que m’ei arribat a 19h30 [03/06/15].
"Qu’ei un document adreçat aus presidents de las duas regions Aquitània e Miègjorn-Pirenèus devath la fòrma d’ua letra signada deus dus ministres de l’Éducacion e de la Cultura. Dens aquesta letra qu’ei indicat que l’Estat s’engatja a autorizar la creacion de l’Ofici Public de la Lenga Occitana e que s’i associarà." [ligam]
27/05/15 - David Grosclaude ven d'entamenar una cauma de la fam a l'Ostal de Region de Bordèu. Contèsta la position de l'estat francés sus la creacion de l'Ofici Public de la Lenga Occitana, l'estat refusa de balhar una seguida al projècte alara que sa creacion es estada aprovada per los conselhs regionals de Miègjorn-Pirenèus e d'Aquitània. Legir sa declaracion [aquí]
A reçauput lo sosten de Alain Rousset president del conselh regional d'Aquitània, de Paul Molac deputat Breton, de la Confederacion de las Calandretas (Jean-Louis Blenet), d'APRENE (Patrice Baccou), del CFPOC (Jean-Brice Brana), del CFPO (Delphine Krajewski, Cédric Valmary), de l'IEO (Pierre Brechet), del Cirdòc (Marcel Mateu), del Congrés permanent de la lenga occitana (Gilbert Mercadier), de l'InÒc (Jean-Jacques Castéret), d'Iniciativa per Occitània, de la FELCO (Felip Martèl), de País Nòstre, d'Unitat d'Aran, del Conselh General d'Aran, de l’Assemblada de Corsega (a l'unanimitat, votacion del 30/05/15), de l'Union Democratica Bretona.
David Grosclaude es conselhièr regional d'Aquitània delegat a las lengas regionalas.
Comunicat de sosten d'Iniciativa per Occitània :
N’i a pro d’èsser mespresats !
La cauma de la fam es un acte pacific e coratjós, una responsa digna a las politicas injustas. Portam a nòstre compatriòta Dàvid Grosclaude tot nòstre sosten per la cauma de la fam que comencèt lo 27 de mai.
Conselhièr regional d’Aquitània, protèsta contra lo desdenh de l’estat francés tocant la creacion de l’Ofici Public de la Lenga Occitana (OPLO), pasmens amplament votada per doas assembladas regionalas d’Occitània, la de sa region aquitana e la de Miègjorn-Pirenèus, en junh de 2014. Mas son accion vòl tanben atraire l’atencion sul mesprètz de l’estat devèrs los ciutadans occitanofòns, e revendica lo respècte de la democracia e de la lenga occitana.
Coma nòstre compatriòta Dàvid Grosclaude, disèm que “N’i a pro d’èsser mespresats.” D’esquèrra o de drecha, los govèrns franceses que se succedisson contunhan la meteissa politica lingüicida e culturicida que definís França dempuèi lo rei Francés Ir. Las promessas electoralas que las fan los candidats a l’eleccion presidenciala, las complisson pas jamai quand son arribats al poder suprèm.
Apelam doncas los occitanistas, delà lo sosten legitim a l’acte eroïc de Dàvid Grosclaude que fa perilhar sa santat per salvar nòstra lenga e nòstra cultura, a se levar totes ensems contra l’estat francés e per convéncer la populacion de nòstre país de l’injustícia de sa politica.
N’i a pro d’èsser mespresats !
Iniciativa per Occitània, lo 29 de mai de 2015
Comunicat de la FELCO :
La FELCO avèm aprés, amb una cèrta tristesa, que Dàvid Grosclaude començava una cauma de la fam. Tristesa, perque pren aquí de riscas per sa santat, que se pòdon justificar pas que per l'urgéncia de la situacion de nòstra lenga tala coma la vèi. Lo ponch de partença de son accion es la question de l'OPLO que sa creacion, decidida entre Conselhs Regionals d'Aquitània e de Miègjorn Pirenèus es pas estada enterinada per un decrèt del govèrn.
Sul fons de la question de l'OPLO, la FELCO a qualques interrogacions, e, cossí que siá, remarca que l'institucion envisatjada concernís pas que doas de las regions occitanas actualas, sens que siá possible per ara de saber çò que ne resultarà dins la nòva configuracion territoriala qu'es a se metre en plaça. Demòra lo fach que lo Govèrn sembla pas considerar coma importanta la decision dels elegits de doas assembladas regionalas, e qu'en tèrmes de democracia, es un problèma.
Per contra, quand Dàvid Grosclaude parla de mesprètz per l'occitan e las autras lengas de França de la part del govèrn, pensam malastrosament que se tracha d'una pura e simpla constatacion. Entre la ratificacion de la Carta, tornarmai promesa e tornarmai enfangada, las dificultats qu'avèm rescontradas per far dintrar la question de las LR dins la lei Peillon, lo combat actual sus la reforma del collègi, sens doblidar nòstras revendicacions recurrentas (pòstes al CAPES, coefficients, vertadièra politica d'ofèrta de l'ensenhament de l'occitan en continuitat de la mairala a las universitats de tot l'airal occitan, emai en region parisenca, e la tièra se poiriá perlongar), las escasenças de nos sentir respechats son estadas mai qu'escarças.
La FELCO manifèsta doncas sa solidaritat al combat coratjós de Dàvid Grosclaude, e espèra que lo Govèrn ne'n tiraràn las consequéncias que cal, sus la question de l'OPLO coma sus totas las autras.
Extrach de l'editorial del Jornalet :
Jornalet anóncia son sosten incondicional a Dàvid Grosclaude. E quand disèm incondicional, volèm dire qu’es pas ora de far d'elògis ni de reprochar, mas ora de sosténer. Volèm dire que non nos impòrta pas sa color politica, sos amics o sas idèas. Nos impòrta son accion eroïca per defendre la lenga nòstra, la lenga qu’aimam e dins la quala volèm viure al país.
Ara l’occitanisme es davant una bona oportunitat de daissar de costat las abitualas luchas intèrnas e de far mòstra d'unitat en sostenent la revendicacion de Dàvid Grosclaude. Fa besonh, mai que jamai, una mobilizacion nacionala de sosten e generositat amb un elegit que ven de demostrar que representa totes los occitanofòns e los qu'aiman la lenga occitana. Aqueste jornal farà tot çò possible per que la lucha de Dàvid Grosclaude reüssisca. Consideram qu’es vertadièrament important qu’aquesta cauma capite ben, e capite lèu. Serà lo succès màger del pòble occitan davant lo mesprètz jacobin de nòstra nacion.
Dàvid Grosclaude, mercés plan !
Comunicat del Conselh Regional d'Aquitània :
Reaction d’Alain Rousset a perpaus de l’accion de David Grosclaude sus la constitucion deu GIP « Ofici public de la lenga occitana »
Compréni la demarcha de David Grosclaude. Rapèri que lo Conselh regionau votèt en junh de 2014 una deliberacion per la creacion de l’Ofici public de la lenga occitana. I a trebucs de levar e pesuguèirs de procedura. Desiri que David Grosclaude aja hidança : l’ahar deveré èster lèu desblocada.
Las Regions Aquitània e Miègjorn-Pirenèus menan una politica partenariala ambiciosa en favor de la transmission e de la socializacion de la lenga occitana. Es dens aqueste encastre que damb Martin Malvy, president deu Conselh regionau de Miegjorn-Pirenèus, s’engatjèrem tre 2010 a crear una aisina interregionala que permeterà de mutualizar e potencializar l’accion publica de cap au desvolopament de l’occitan.
Aquesta demarcha nos menèt a deliberar amassa en junh 2014 per fin de crear lo Gropament d’Interés public « Ofici public de la lenga occitana ». Lo dorsèir sancèir estut depausat en Prefectura de Miègjorn-Pirenèus lo 1èir d’agost de 2014, pui estut transmetut peu prefècte de Region a l’escalon centrau de l’Estat lo 18 de seteme de 2014.
A maugrat de las nòstas multiplas relanças, damoram dens l’esper d’un arrestat interministeriau validant la creacion d’aqueste establiment public, alara qu’aqueste arrestat devé èster produsit abans debuta de deceme de 2014, per una operacionalitat d’aqueste organisme tre lo 1èir de genèir de 2015.
David Grosclaude lo sap, es per nosauts un dorsèir prioritari, deu quau balham una importància tota particulara. Pr’amor d’aquò, es indispensable que l’Estat permetèsse lèu la creacion formala de l’Ofici public de la lenga occitana, quitament se ne’n es pas enquèra membre, perqué aquesta aisina es primordiala per l’estructuracion e l’avenidor de la politica linguistica interregionala en favor de la lenga occitana.
A l’escadença de la ceremonia de dentrada de las quate figuras de la Resisténcia au Panteon aqueste vrèspe, èi sasit personaument lo president de la Republica sus aqueth dorsèir.
Corrièr de Paul Molac a Manuel Valls :
Jeudi 28 mai 2015
Monsieur le Premier ministre,
Monsieur David Grosclaude, Conseiller régional d’Aquitaine délégué aux langues régionales,a entamé ce 27 mai 2015 une grève de la faim. Il a certainement choisi cette solution en désespoir de cause pour débloquer un projet qui lui tient à cœur et qui est soutenu par tous les défenseurs des langues régionales : la création d’un Office Public de la Langue Occitane.
Ce projet fédérateur, soutenu par les deux présidents de régions que sont Alain Rousset pour l’Aquitaine et Martin Malvy pour le Midi-Pyrénées, et votés par les deux assemblées régionales, a été porté par Monsieur Grosclaude. Il s’y investit maintenant depuis plusieurs années. Déjà plusieurs régions de l’aire occitane ont fait savoir leur intérêt et sont prêtes à travailler ensemble.
Il ne manque aujourd’hui que l’engagement, très modeste, de l’Etat pour finaliser ce projet de création du Groupement d’intérêt public pour l’Office public de la langue occitane. Ce GIP est bloqué depuis plus d ’un an. Ce projet exemplaire serait enfin en mesure de donner à l’aire occitane l’organisme de coordination et de réflexion qui lui fait défaut pour empêcher la disparition de cette langue.
Il existe désormais un office public pour les grandes langues patrimoniales de notre pays : alsacien, basque, breton, corse. L’occitan est la langue de tout le sud de la France et il serait curieux que la volonté des élus et des habitants ne soit pas entendue par le Gouvernement.
J’ajoute que cette langue a donné un riche patrimoine littéraire à notre pays, depuis les Troubadours dont les textes en occitan sont classés dans la catégorie « ancien français », jusqu’à Frédéric Mistral et son Prix Nobel en 1904 pour une oeuvre en occitan.
Aujourd’hui, cette langue donne encore de beaux fruits littéraires.
Le blocage interministériel actuel quant à la publication de ce décret ne doit pas perdurer et je fais confiance à votre sagacité et votre esprit de décision pour régler ce problème dans les meilleurs délais.
En vous remerciant d’avance, veuillez agréer, Monsieur le Premier ministre, l’expression de mes salutations respectueuses.
Paul Molac