14/11/2016 - En seguida de la decision del municipi de la comuna de Besièrs e de son cònsol màger Robert Ménard, d'arrestar de finançar lo CIRDÒC, l'associacion Iniciativa per Occitània comunica.
Lo Centre Interregional de Desvolopament de l’Occitan (CIRDÒC) a Besièrs es un establiment public gerit per un sindicat mixte dobèrt. Es installat dins lo quartièr universitari de Besièrs, dins un bastiment modèrne de 900 m2.
Animat per un desenat de personas, lo CIRDÒC recampa tota la memòria d’Occitània e participa activament al desvolopament de la lenga e de la cultura nòstra. De mai, es una institucion inscricha dempuèi d’annadas dins lo païsatge cultural de la vila. Ne valoriza l’imatge fins a l’internacional.
Uèi lo CIRDÒC patís una ataca sobta e violenta de part del cònsol de la vila, Robert Ménard, e de sa majoritat municipala. Lo budget annal de la dinamica institucion es normalament de 1,1 milion d’èuros. Aquò inclutz una participacion de 206 000 € de la comuna de Besièrs.
Lo cònsol Ménard, jol fals pretèxte de restriccions budgetàrias, a decidit de suprimir la subvencion annala, siá mai del 18 % del budget. Curiosament del temps que Ménard suprimís l’ajuda al CIRDÒC, reüssís el a trapar de sòus per finançar de campanhas d’afichatge racistas, pròva que l’argent i es. Mas pel CIRDÒC aquesta pèrda de rintradas de fonzes met en perilh la santat de l’institucion e son foncionament.
Iniciativa per Occitània denóncia amb fòrça la supression del finançament comunal del CIRDÒC e ne demanda lo restabliment immediat e perenne. La moneda publica dels occitans es una valor comuna qu’a vocacion de servir l’interès comun dels occitans. Lo CIRDÒC es un d’aquestes interèsses comuns. Es lo ben comun de totas las occitanas e de totes los occitans e al delà d’aquò es patrimòni de l’umanitat.
Iniciativa per Occitània demanda a totas las personas de bona volontat de se levar per far front e luchar contra la temptativa de Ménard e de sa còla d’estofar lo nòstre CIRDÒC.
Iniciativa per Occitània
*
Tanben de saupre, una associacion Los amics del CIRDÒC es estada creada. Aquí çai jos la presentacion que propausan sos creators sul site internet amicsdelcirdoc.com :
Coma aquò se practica en sosten a las grandas institucions culturalas publicas (Musèus, Bibliotecas, Arquius), d’universitaris, cercaires, lingüistas e istorians, ensenhaires, escriveires, artistas, franceses e estrangièrs, se son recampats al mes de Junh 2016 per constituir l’associacion dels Amics del CIRDÒC.
L’objècte d’aquela associacion es d’acompanhar lo CIRDÒC dins sa volontat d’enriquesir e d’avalorar sas colleccions, e dins totas sas activitats. Principal establiment cultural interregional consagrat au patrimòni e a la creacion occitans, lo CIRDÒC es un pòl d’excelléncia màger, sempre al servici del public e dels cercaires, que met a disposicion de cadun la cultura d’òc, de mercé, es de notar, lo portal numeric Occitanica.
Estacats a aquel establiment, los sòcis vòlon obrar cotria per far viure lo CIRDÒC e lo far raionar tant al nivèl local coma al nivèl internacional. L’associacion aculhís qual se vòl enregar sus aquela dralha, tant coma los usatgièrs o los simples simpatisants.
Una Assemblada constitutiva a elegit un Conselh d’Administracion e un Burèu provisòris (Gérard Gouiran, president, Peire-Joan Bernard secretari, e Joan-Guilhem Roqueta, clavaire).
Los amics del CIRDÒC