'Larzac... Larzac...' de Georges Nespoulous

La edicions E... rau ! publiquèron a la debuta de 2026 lo libre Larzac... Larzac... de Georges Nespoulous.

L'accion del roman se debana al camp militar de Larzac. Aqueste creat en 1902 foguèt al sègle vint, un lòc provocant l’interès dels estatjants de Roergue mas tanben, los tres quarts del temps, l’èrnha dels òmes apelats per participar a de manòbras militaras.

L'autor situa l'accion d'una part a la fin de las annadas cinquanta e a la debuta de las annadas seissanta pendent la guèrra d’Argèria ont lo camp militar foguèt agençat en camp d’embarrament de militants del FLN (Front de Liberacion Nacionala argerian).

L'autra part de l'accion se debana dins las annadas setanta amb lo projècte d’espandiment del camp militar que provoquèt lo regèt massís dels païsans de Larzac e d’una cèrta opinion publica.

Mesclant ficcion e realitat Georges Nespoulous nos fa viure d’eveniments istorics e de dramas misterioses.

Nascut a Sant-Africa en Roergue, regent de formacion, l'autor faguèt puèi d’estudis per venir professor certificat e principal de collègi. Pendent vint-e-cinc ans assumiguèt aquesta foncion.

Acabèt sa carrièra coma Principal del Collègi de Sant-Joan de Vedaç pendant una dotzena d’annadas, vila ont es, ara, retirat. I demòra mas passa de pontannadas a Versols del costat de Sant-Africa.

Ausiguèt parlar occitan non pas en familha mas en vacanças dins un vilatge avaironés a cò de sa grand. Aguèt una revelacion a la lectura de La grava sul camin de Joan Bodon puèi de totas sas òbras que lo butèt a s’interessar a l’occitan.

Se decidiguèt a escriure recentament. Son primièr roman Dorotèa es estat publicat per L’Aucèu libre en 2021. Larzac... Larzac... es son segon roman.

Lo libre de 452 paginas es en occitan amb la traduccion francesa. Costa 20 €.

Cobèrta del libre Larzac... Larzac de Georges Nespoulous (E... rau ! 2026)

Georges Nespoulous presenta son libre

A cada jorn, son mièg lum - Ives Roqueta

a-cada-jorn-son-mieg-lum A cada jorn, son mièg lum d'Ives Roqueta es estat publicat per Letras d'òc.

Lo libre de 120 paginas paregut a la prima de 2015 pauc de temps après la mòrt de l'autor es la seguida de L'ordinari del monde.

Aquí, Ives roqueta nos propausa una tièra de nòvas. Es lo quotidian, son anar lent, fach de doçor, de violéncia que l'autor, aicí, conta. Gèstes, objèctes banals, saupèt ne tirar vida e poesia.

Parlar lèser e escriure en occitan alpenc

parlar-leser Parlar lèser e escriure en occitan alpenc de D. Anghilante e G. Bianco. Editor : Chambra d'Òc, manual e CD rom, 2002, 24 èuros.

Presentacion : Aqueste manual vòl èsser una premièra aisina per aprene a parlar, lèser e escriure en occitan alpenc vista l'exigença d'una lenga escricha, en aplicacion de la Lei 482-99 e per comunicar entre nosautres occitans cisalpencs e amb Occitània tota.

20 tèxts didàctics - ortografia - gramatica - exercicis - literatura

Sèt pans - Leon Còrdas

sets-pans Sèt pans, un libre de Leon Còrdas (IEO Edicions, 1977).

Extrach pagina 121 : "A la darrièra bocada lo gojat escorreguèt son veire e sortiguèt en disent qu'aviá quicòm a faire al tractor.

"I aviá benlèu quicòm a faire que levèt lo capòt, furguèt dins la caissa de las claus, ne prenguèt una, puèi çaganhèt lo motor. Mas qué que faguèsse sa pensada èra, d'aquel moment, a vint lègas d'aquí - sa pensada embrumassida e esmeravilhada a l'encòp, coma aquelis matins d'estiu ont corrís una nèbla bassa que seguís lo clòt de la comba e passa prim los rais de lum a travèrs son sedaç magic."