Al mes de mai e de junh de 2025 lo Partit de la Nacion Occitana (PNO) e lo Partit Occitan (PÒC) comunicavan sus la represa de la construccion de l'autorota A69. Doas visions que s'opausan.
Comunicat del PNO :
Lo Partit de la Nacion Occitana saluda la represa de la construccion de l'autorota A69
La construccion de l’autorota A69 entre Tolosa e Castras, prevista dempuèi mai de trenta ans, a per objectiu de desenclavar lo bacin de populacion Castras-Masamet, qu’a una populacion de 100 000 abitants.
Aquel bacin de populacion a conegut una desindustrializacion significativa dempuèi de decennias, çò qu'es estat gaireben catastrofic per Masamet, una anciana vila de deslanatge.
Lo Partit de la Nacion Occitana a totjorn preconizat lo desvolopament economic equilibrat de nòstre país.
Dempuèi sa creacion, a embraçat l'eslogan « Volèm viure e trabalhar dins lo país. »
Es per aquò que participèt a la manifestacion màger del 8 de març a Castras per la represa de la construccion.
D’efièch, lo 27 de febrièr passat, la Cort Administrativa tolosana anullèt los permeses environamentals emeses per l’Estat, çò qu’arrestèt immediatament la construccion, en metent mai d’un milièr d’obrièrs al caumatge.
De nombroses recors foguèron depausats, en particular per practicament totes los elegits de la region d'Albi.
Lo 21 de mai passat, pendent l'audiéncia davant la Cort Administrativa d'Apelacion tolosana, lo raportaire public, un magistrat que sas opinions son generalament seguidas, se declarèt favorable a la represa de la construccion, en considerant que l'importància de las vilas de Castras, Masamet e Tolosa justificava « per lor quita natura que foguèssen connectadas per d'infrastructuras rotièras rapidas ».
Fin finala, aqueste dimècres 28 de mai, la Cort Administrativa d’Apelacion tolosana autorizèt tanben la represa de la construccion de l’autorota.
Aqueste còp, lo tribunal decidiguèt sus un recors d'urgéncia depausat per l'estat.
Aquò es un solatjament per la granda majoritat de la populacion afectada.
Aquela decision arriba cinc jorns abans que l’Assemblada Nacionala vòte un projècte de lei nomenat validacion, que foguèt ja adoptat per una granda majoritat al Senat lo 15 de mai passat.
Aquela rota parlamentària prevei d’autorizar la continuacion de la construccion de l’A69, sens esperar que la cort d’apelacion administrativa se prononcièsse sul meriti de l’afar.
Una decision, qu'espèram que serà definitiva, deuriá èsser presa dins qualques meses.
Sens demora, la construccion de l’autorota A69 reprendrà doncas dins los jorns venents.
L'A69 èra inicialament prevista per dobrir a la fin de 2025.
Aquò es pas pus possible. La represa serà graduala, doncas que las entrepresas devon ara tornar contractar un milièr d’emplegats e transferir una granda quantitat d’equipament de construccion sul site.
Pel moment, la rason e lo bon sens se son impausats. De son costat, lo Partit de la Nacion Occitana demòra vigilant per çò qu’es de l’acabament d’aquela infrastructura, qu’es essenciala per dobrir una region occitana qu’a degut esperar mai de trenta ans per veire aquel projècte, qu’a pas res d’excepcional, venir a tèrme.
Lo Partit de la Nacion Occitana, mai de 2025
Comunicat del PÒC :
A69, projècte arcaïc !
La cort d’apèl administrativa de Tolosa a decidit d’autorisar la represa de las òbras de l’autorota A69 que vòl ligar Tolosa a Castras. Lo raportaire public a demandat que tòrnen prendre las òbras amb los meteisses arguments : lo desenclavament economic de Castras. L’argument es questionable e foguèt questionat en primièra instància. Evòcan tanben l’avançament tròp grand de las òbras e lo còst « proïbitiu » de la remesa en estat de las zònas tocadas. De tota faiçon, represa o pas, lo contribuable deurà pagar la factura e serà salada.
En mai de l’Estat fasent apèl de la primièra decision, los partesans de l’autorota an beneficiat del zèl dels senators que votèron en urgéncia una proposicion de lei de validacion abans que la cort d’apèl administrativa se prononcièsse...
Mèstra Alice Terrasse, avocata de las associacions opausadas a aquela infrasetructura explica :« L’Estat crei talament pas en sos arguments qu’a fait votar una lei (...) neutralizar aital una decision de justícia, aquò s’èra jamai vist ». Per çò qu’es de l’imperatiu economic, la femna de lei considèra que s’agís pas que d’una « autorota de confòrt pels salariats de Pierre Fabre qu’an causit de viure a Tolosa e que van trabalhar a Castras ».
L’argument del « desenclavament » es utilizat per totes los grans projèctes inutils. D’elegits e de responsables economics fan de miserabilisme e dison que se las autras vilas an d’autorotas e de LGV tot lo monde i an dret. Lo PÒC refusa aqueles arguments que son d’una autra epòca. Sabèm ara, e dempuèi d’annadas qu’aquelas infraestructuras an pas jamai salvat un territòri. Al contrari ajuda a la desertificacion en facilitar la concentracion metropolitana.
Lo Partit occitan denóncia aquela tendéncia pesuga de renonciament ecologic de la part dels diferents govèrns. La necessitat absoluda de metre en plaça una politica des preservacion dels espacis e de la diversitat biologica es denonciada coma una empacha mentre qu’es la sola solucion per garantir una qualitat de vida a las geberacions futuras. Un valat se cava entre elegits e ciutadans. Los primièrs an pas encara comprés que sèm pas mai dins las Trenta Gloriosas.
Partit Occitan, lo 2 de junh de 2025