Lo Partit de la Nacion Occitana (PNO) comunica sus sa preséncia l'Estivada de Rodés.
Lo Partit de la Nacion Occitana present a l’Estiva 2022
Coma cada an dempuèi qu’existís lo festenal panoccitan de Rodés l’Estivada, Lo Lugarn, revista trimestrala del Partit de la Nacion Occitana, tornarà un còp mai ongan dins lo capluòc de Roergue.
Aqueste rescontre se debanarà sus tres jorns los 21, 22 e 23 de julhet de 2022. Nòstra organizacion militanta ocuparà coma de costuma un cabanon del vilatge associatiu. Tot al long de la manifèstacion de militants del nacionalisme occitan se van relevar en permanéncia per recebre lo public. I serètz los benvenguts. Cada festivalièr se poirà atal entresenhar sus las activitats e los produchs del Lugarn. Siá se poirà abonar a gratis al blòg Lo Lugarn, siá se poirà abonar – per la modica soma de 20 € annadièrs – a la revista trimestrala papièr del meteis nom. Un periodic que contunha de paréisser après mai de seissanta ans d’existéncia, adoncas, e sens contestacion possibla, es la mai anciana revista politica occitana.
Aquesta revista, qu’es mai qu'un periodic informatiu, demòra actualament la sola revista occitana qu'aja una reflexion politica de fons. Un vintenat de redactors s’i exprimisson per un contengut tras que diversificat. Alavetz, vos serà presentada al cabanon del Lugarn per de militants del Partit de la Nacion Occitana los 21, 22 e 23 de julhet de 2022.
Entre dos concèrts e tres balòchas, vos esperam totes per un rescontre militant a Rodés. Serà tanben l’escasença d’escambiar e de far coneissença amb los que son ja abonats. Convivéncia e militantisme seràn al rendètz-vos del cabanon del Lugarn. Vos i esperam.
Lo comitat de redaccion del Lugarn