Los caps d'Estat e de govèrn membre del G7 remosats a Evian en França al mes de junh de 2026 tornèron afortir lor sosten a Ucraïna.
Dins una declaracion comuna an declarat : « Nosautres, caps dels Estats del G7, sèm units dins nòstre sosten incondicional a Ucraïna per defendre sa libertat, sa sobeiranetat e son integritat territoriala. »
Demai asseguran que son prèstes a augmentar la pression sus l'economia de guèrra russa e a refortir lors sancions, aquelas sus los sectors del petròli e del gas inclusas.
La declaracion publicada precisa : « Consideram qu'es lo bon moment d'avançar en propausant de mesuras suplementàrias, pr'amor que lo president Trump a conclús un acòrd que sostenèm per tornar dobrir lo Destrech d'Ormuz. »
An tanben propausat d'augmentar la liurason d'armas a Ucraïna e de los ajudar a desvolopar lor sistèma industrial de produccion d'armament.
Lo G7 se debanèt del diluns 15 al dimècres 17 de junh de 2026.
Establit a l'iniciativa de França a la seguida de la primièra crisi del petròli, lo G7, o Grop dels 7, es un forum de discussion e de partenariat economic que reünís cada an los caps d'Estat e de govèrn dels sèt païses seguents : França, Estats Units, Canadà, Japon, Reialme Unit, Itàlia e Alemanha.