Es estada signada lo 11 de decembre de 2017 a l'Ostal de la Region Nòva Aquitània la convencion academica per desvolopar e estructurar l’ensenhament de l’occitan dins l’acadèmia de Bordèu.
Los signataris son : Olivier Dugrip, rector de l’acadèmia de Bordèu, Alain Rousset, president de la Region Nòva Aquitània, Charline Claveau-Abbadie, presidenta de l’Ofici public de la lenga occitana, Régine Anglard, vice-presidenta del Conselh departamental de Dordonha, Danielle Lacoste, Marcel Calmette, Monique Sémavoine que representavan respectivament los departamentals de Gironda, d’Òlt e Garona e dels Pirenèus-Atlantics.
Aquela convencion, fixa d’objectius en tèrme d’obertura de nòvas escòlas bilingüas francés/occitan (una obertura per an e per departament), permet d'organizar las concertacions entre los servicis de l’Estat, las collectivitats territorialas signatàrias, l’Ofici public de la lenga occitana e las associacions.
Met tanben en plaça un dispositiu d’abilitacion-formacion pels professors que desirarián integrar d’occitan a lors ensenhaments, apiejat a un dispositiu d’ajuda financièra individuala : las borsas Ensenhar.
Aquela convencion academica declina la convencion nacionala signada lo 26 de genièr de 2017 pel ministèri de l’Educacion nacionala, las regions Nòva Aquitània e Occitània, e l’Ofici public de la lenga occitana. Prevesiá per las acadèmias de Bordèu, Lemòtges, Montpelhièr, Peitius e Tolosa, de modalitats d’ensenhament armonizadas, la continuitat dels cursusses d’ensenhament pels escolans, la possibilitat d’experimentar l’ensenhament immersiu dins l’ensenhament public, e tanben l’afortiment dels otisses de concertacion e d’evaluacion de las accions.