En decembre de 2020 Joan-Loís Blenet tornava dins sa cronica del Midi Libre sus la signatura en novembre de 2020 d'una convencion per l'ensenhament de l'occitan dins las acadèmias de Tolosa e Montpelhièr.
Convencion d’ensenhament
Una lenga qu’es pas ensenhada es condemnada. Passèron sègles sens qu’aquò siá verai. Èra abans l’escòla. Mas dins un monde que l’escrich es de pertot, sens ensenhament de qualitat, ges d’avenidor.
Per aquò se debanèt en novembre un eveniment que la virussada amaguèt amor que nos vampiriza l’actualitat. Se signèt una convencion per desvolopar l’ensenhament de l’occitan als rectorats de Montpelhièr e Tolosa. Concretiza una convencion-quadre, es a dire sens res de precís, signada en genièr de 2017 per la ministra d’abans, Vallaud-Belkacem.
Vesètz que per l’òc se cal afanar e saber durar per avançar. Cal saludar lo trabalh testard e de longa man de la Region per aquò. Quatre ans, aquò dona la mesura de l’estrambòrd de l’actual ministèri per aquel domeni. Pasmens amb pas que 3 % dels dròlles qu’an un ensenhament de l’occitan, i a de que desvolopar !
Los signataris son los Rectors, la Presidenta de la Region e l’OPLO (Ofici Public de la Lenga Occitana). Mai la Vila de Tolosa e sièis Departaments : Avairon, Gers, Garona-Nauta, Pirenèus-Nauts, Tarn e Tarn e Garona. Vesèm plan que los quatre concernits de Lengadòc brilhan per lor abséncia. La lenga dona lo nom de lor país e desèrtan son ensenhament ! Mas a las eleccions nos van cantar fòrt qu’an tot comprés de l’ecologia e de la diversitat.
Joan-Loís Blenet