En 2021 l'Ofici Public per la Lenga Occitana se dotava d'un comitat conselh. En abril comunicava sus l'eveniment.
L'OPLO se dòta d’un comitat conselh
L’Ofici public de la lenga occitana (OPLO) es un gropament d’interès public que l’Estat (Ministèri de l’Educacion nacionala e Ministèri de la Cultura), la Region Novèla–Aquitània e la Region Occitània li an delegat lors competéncias en matèria de politica lingüistica dedicada a la lenga occitana.
Augmentar lo nombre de personas que parlan e que comprenon l’occitan
Dempuèi sa creacion en 2016, l’Ofici public de la lenga occitana s’es donat per objectius de far la promocion de l’occitan, de ne melhorar la transmission e d’augmentar lo nombre de personas que parlan e comprenon la lenga. Per tal de melhorar l’eficacitat de sas accions e en seguida d’una experimentacion capitada en 2019, l’OPLO ven d’adoptar un comitat conselh perene que serà en carga de balhar sos vejaires sus l’estrategia globala del gropament e sas orientacions a mejan e long tèrme, los projèctes a venir o encara las demandas de subvencions.
Afinar las causidas estrategicas e afortir la demarcha de concertacion
« L’instauracion d’aquel comitat-conselh va permetre a l’OPLO d’afinar sas causidas estrategicas e lor ierarquizacion – i a tant a far, mas tanben de beneficiar de competéncias complementàrias an aquelas de l’equipa e de sas tutèlas », explica Charline Claveau, presidenta de l’OPLO. « L’enjòc es tanben d’assolidar una demarcha mai sistematica de concertacion, en associant lo mitan occitan e d’autres actors extèrnes pertinents a l’elaboracion de las politicas publicas dedicadas a la lenga occitana ». Concretament, aquel comitat-conselh se compausarà de diferents representants de collectivitats territorialas, d’establiments de formacion, d’associacions o de mèdias. Sa composicion, provisòria, serà menada a evolucionar dins los meses que venon.
« Lo mai important èra d’estructurar un encastre de concertacion perseguís Charline Claveau. Fins ara, aviam concertat ponctualament, a de moments-claus, coma per l’elaboracion del plan d’accion de l’Ofici, o sus cèrts subjèctes fòrça especifics, coma per l’elaboracion de la campanha d’informacion sus l’ensenhament de l’occitan al collègi. Èra indispensable d’assegurar una demarcha mai larga e mai sistematica a l’entorn del projècte general de l’Ofici, e en prevision de l’arribada d’una equipa novèla de governança a l’Ofici. Lo moment es lo bon : après quatre ans d’existéncia, l’OPLO es ara plenament operacional, a començat sos dispositius d’intervencion essencials e pres sa plaça dins lo païsatge institucional ; enfin, sas equipas son renfortidas. »
Lo comitat conselh es ja estat consultat a la fin de març per estudiar las demandas de subvencions. Se reünirà a la fin d'abrial e aurà per tasca de soscar sus sa pròpria composicion e sus las melhoras modalitats de trabalh d’aquel organ novèl.
L'OPLO, abril de 2021