Dins lo numèro 156 de sa revista Lo lugarn, paregut en decembre de 2025, lo Partit de la Nacion Occitana (PNO) tornava sus sa posicion rapòrt a l'Union Europèa.
Lo Partit de la Nacion Occitana e l'Union Europèa
La posicion sus Euròpa del Partit Nacionalista Occitan, vengut Partit de la Nacion Occitana en 2004, a cambiat dempuèi sa creacion per Francés Fontan en 1959.
Aquel, desaparegut en 1979, considerava la construccion europèa coma lo caval de Tròia de l'imperialisme anglo-american en Euròpa, relevat per l'Alemanha federala. Tres ans après sa mòrt, l'editorial del Lugarn n° 17 èra entitolat : « Denonciar lo Tractat de Roma » e suggerissiá d'o tornar negociar o d'o remplaçar per d'acòrdis bilaterals de cooperacion.
Lo meteis numèro comportava una « Cronica anti-europeïsta » ont èra question de Jean-Baptiste Doumeng, àlias lo miliardari roge, e de sa presa de posicion contra lo mercat comun. Lo P.N.O. li es estat un temps associat dins un front anti-mercat comun recomendant lo boicòt de las eleccions europèas de 1984.
En 1989, Lo Lugarn n° 32 publicava un article de Jacme Ressaire, alara president del P.N.O., entitolat : « Euròpa, l'illusion granda » dins lo qual escriviá mai que mai : « l'unificacion europèa es un cimbèl. »
Mas aquela posicion anti-europèa deviá progressivament èsser abandonada per pragmatisme en regetant tant l'eurofilia beata que l'eurofobia dels sobeiranistas franceses partidaris del frexit.
Ja en 1994, lo P.N.O. se prononciava per una Euròpa federala privilegiant lo regionalisme.
Vint ans mai tard, lo P.N.O. dins sa revision del programa de Sèta de 1998 se declarava « favorable a una construccion europèa rasonabla », en tot precisant que : « Dins l'Union Europèa, la dimension etnoculturala deu èsser vertadièrament presa en compte. »
Uèi, lo P.N.O. es partidari de la creacion d'un Estat occitan independent, membre de l'ONU e de l'Union Europèa mas se mòstra critic de cap a l'evolucion de l'Union. Aquesta es una Euròpa dels Estats, pas l'Euròpa de las etnias que desira lo P.N.O., e aqueles se sarran los coides. Pas question per Euròpa d'ingeréncia dins los afars considerats coma intèrns dels membres.
Al nom d'aquel principi, Euròpa es pas intervenguda en 2017 pendent la repression del referendum d'auto-determinacion dels catalans enebit per l'Estat espanhòl.
Se lo resultat del referendum de 2014 en Escòcia èra estat la victòria de l'òc en plaça del non, l'Union Europèa aviá avertit que l'admission d'Escòcia coma novèl membre seriá pas automatica. Auriá calgut qu'aquesta faguèsse una demanda d'adesion, un procediment long e a la finalitat incertana.
Lo P.N.O. critica egalament l'orientacion de l'accion de la Comission europèa que se compòrta coma un governament europèu non elegit e que prepausa de suprimir.
Sos tecnocratas passan lor temps a produire de novèlas nòrmas, pas totjorn justificadas o aplicablas, dins totes los domenis, de nòrmas aplicadas amb zèl per l'Estat francés que las rend encara mai constrenhentas.
D'autra part, un autre subjècte de friccion es lo Mercosur.
Los caps d'Estat e de governament de l'Union devon decidir pendent lo Conselh europèu del 18 de decembre de balhar lor acòrdi, o non, a la ratificacion del tractat amb lo Mercosur (lo mercat comun del Sud — un blòc comercial sud-american creat en 1991.) al qual l'Assemblada nacionala francesa (la posicion del president de la republica es ambigüa) e los agricultors son opausats en l'abséncia d'alinhament de las nòrmas sanitàrias e environamentalas, una posicion que sosten lo P.N.O.
En matèria economica, Euròpa se deu mostrar mens dobèrta e mai protectritz dels interèsses de sos membres de cap a China, als Estats Units e al demai del monde.
Pertocant Ucraïna, desira dintrar dins l'Union Europèa, un còp la guèrra menada per Russia acabada. A mai de legitimitat per o far que la Turquia d'Erdoğan.
Mas calrà resòlvre lo problèma de l'agricultura ucraïniana que risca d'espotir la concurréncia dins l'UE.
Las paraulas del General francés, Mandon, segon las qualas una guèrra entre los païses de l'OTAN e Russia es possibla e se cal preparar a « pèrdre de mainatges » an suscitat una polemica.
Lo P.N.O. denóncia lo pacifisme d'una partida de la classa politica, intellectuala e mediatica e de d'unes occitanistas que servís perfièchament los interèsses de l'agressor, Putin.
L'UE sosten militarament e diplomaticament Ucraïna a bon drech anar mas deu far mai per portar remèdi al desengatjament de Trump e empachar d’atacas novèlas de Putin en Euròpa.
Çò dont a besonh Euròpa, segon lo P.N.O., es de rearmament e d'una defensa comuna e pas de potonorses.
Malgrat aquelas criticas, lo P.N.O. envisatja una Occitània independenta dins una Union Europèa reformada que seriá pas mai l’Euròpa dels Estats mas l’Euròpa dels pòbles.
Visca Occitània liura !
Lo PNO dins Lo Lugarn numèro 156