A la debuta del mes de genièr de 2026 lo Partit de la Nacion Occitana (PNO) tornava sus l'operacion menada pels Estats Units contra lo dictator Nicolas Maduro.
Veneçuèla
Lo Partit de la Nacion Occitana se regaudís de la casuda del dictator veneçolian Nicolas Maduro, que ruinèt l'economia de son país e que poguèt demorar al poder sonque en trucant los resultats electorals.
Sens suspresa, l'intervencion militara americana es estada denonciada pels aliats dictatoriaus de Veneçuèla : Iran, Cuba e Russia, qu'a pas cap de vergonha de criticar los Estats Units malgrat sa pròpria guèrra contra Ucraïna.
Tanpauc sens suspresa, en França, lo lider maximo de La France Insoumise, Jean-Luc Mélenchon, e lo Partit Socialista an condemnat l'operacion.
Pasmens, cal notar que l'ONU, que son ròtle es en principi de far respectar lo drech internacional qu'interditz l'intervencion militara d'una poténcia estrangièra dins un país sobeiran, es completament impotenta.
Quant al president american Donald Trump, consultèt quitament pas lo Congrès american e fa renàisser l'intervencionisme dins lo « Prat cairat » dels Estats Units.
Nicolas Maduro, sospiechat d'aver de ligams amb un cartel de traficants de dròga, serà jutjat per un tribunal federal american e non pas per un tribunal internacional, çò qu'auriá estat preferible.
De mai, Trump a anonciat que los Estats Units bailejaràn Veneçuèla durant la « transicion democratica » e que las companhiás petrolièras americanas tornaràn dins un país del qual èran estadas expulsadas.
Mas coma l'aparelh d'Estat de la dictatura demòra intacte, una novèla intervencion militara americana pòt pas èsser descartada.
Demòra de veire se Trump s'arrestarà aquí e serà pas temptat d'intervenir en Iran.
L'America de Trump es tornada venir una poténcia imperiala que mena la guèrra contra d'unes imperialismes mas pas totes.
Lo Partit de la Nacion Occitana prefeririá que l'administracion Trump donèsse fòrça mai de sosten a Ucraïna en li fornissent los mejans militars per forçar Russia, que reconeis pas que la fòrça, a negociar seriosament.
L'administracion Trump, que mespresa sos aliats europèus, fariá melhor de collaborar amb eles per contrar l'imperialisme rus.
Lo Partit de la Nacion Occitana plànherà pas Maduro, mas desaprova lo retorn de la diplomacia de la canonièra al detriment de la vertadièra diplomacia e de las relacions amicalas entre totas las nacions del monde dins lo sens etnolingüistic del tèrme.
Lo PNO genièr de 2026