Cronica occitana Al Canton (Jornal del conselh general d'Avairon, mai de 2012).

Desvolopament durable

Lo desvolopament durable se vòl respectuós del patrimòni natural e cultural. L’innovacion e la creacion, portairas d’un avenidor melhor per l’Umanitat, devon prene en compte las consequéncias, a cort e a long tèrme, per l’environament, la qualitat de vida e la diversitat naturala (biosfèra) e culturala.

Las generacions de Roergasses an sachut metre en valor un departament que li se trapan causses, rogièrs, segalars, montanhas, tèrrafòrts e ribièiras. Devesas e pradas pel bestial, camps per las viandas, ribièiras per las vinhas e la frucha, castanhals... Ara, amb las eolianas, l’energia idroelectrica e la biomassa, lo departament dispausa de mejans pel desvolopament durable.

Preservar e valorizar la diversitat lingüistica, mas atanben la diversitat de las tradicions, dels paisatges o de las produccions materialas (patrimòni bastit, produccions agricòlas e artesanalas...) son de preocupacions de mai en mai presentas dins las politicas territorialas.

En Avairon, l’aduja e las iniciativas del Conselh general per la lenga e la cultura occitanas van dins lo sens d’una vertadièra politica de desvolopament durable.