Se debanarà del 19 al 21 de julhet a Cucunhan la fèsta del conte.
Coma de costuma, dimars 19, l'eveniment se dobrirà (15h) per un concors de sermon per veire se se trapa d’amators o de professionals de la paraula de bon nivèl. En seguida, l'encontre amb los vinhairons del país (18h30) prendrà la forma d’un aperitiu contat. Aquesta activitat serà un moment renovelat cada jorn. En serada, montaràn sus l’empont Anne-Gaëlle Duvochel (en francés) e lo peiregòrd Danièl Chavaroche (en occitan) amb sas istòrias inspiradas del país per mostrar la non-existéncia de frontièras entre l’universal e lo local.
Dimècres 20, del matin a la nuèit, contaires e contairinas prendràn de longa la paraula. Daniel Chavaroche tornarà intervenir tre 10h del matin ; Patric Erard seguirà (11h15) amb de paraulas d’un còp èra pels tempses presents. Alan Roch presentarà Joan de l’Ors e sos collègas dels contes d’òc (15h30), en s’apiejant sus la mòstra Los amics de Joan de l’Ors. Claudi Alranq, comedian e contaire, aurà carta blanca per animar la serada (21h). En francés, aniràn a l'encontre dels auditors : Bernard Barbier (10h45), Laurent Battist (14h30) , Myriam Rubis (16h30) e Michel Galaret (17h15).
Dins los moments originals del dijòus 21, una dormida coquina serà prepausada per Marie Dimas (14h30) que s’inspirà dels contes d’Enric Gogaud. Kamel Guennoun e Bernard Barbier (16h) interpretaràn un espectacle dedicat al vin. Lo Teatre de las Originas presentarà sa conferéncia borlesca d’interès occitan consacrada al Patrimòni Cultural Immaterial (17h15). Se tornarà trapar Myriam Rubis (11h) e Alan Roch (11h45). Malika Verlaguet contarà dins la vesprada, a l’ora de despertinar (15h15), abans de dobrir la serada (21h). Olivier de Robert (22h15) clavarà aquestas tres jornadas cucunhanencas.
L'eveniment se perseguirà al delà. Doas seradas catalanas son al programa.
Lo divendres 22, a Elne, la tantossada serà dedicada als dròlles e a la lenga catalana. Aperitiu contat amb los vinhairons locals (18h30) abans las prestacions d’Olivier de Robert e Jordi Mach en serada.
L’endeman, dissabte 23, a Tautavel, aperitiu contat e Jordi Mach son tornar al programa, es Olivier Ponsot que serà lo contaire en francés.
Aficha de l'eveniment
