Per la cinquena annada consecutiva l'universitat de Tolosa II-Lo Miralh oraganiza las conférencias DMOO. D’especialistas d’universitats francesas, europencas o americanas venon presentar lors darrièrs trabalhs sus la lenga, l’istòria o la literatura occitanas - [lo .pdf de presentacion]
Los rescontres son dubèrts a totes. Las conferéncias son en francés. La dintrada es liura. Lòc : Ostal d’Occitània, 11, carrièra Malcosinat - 31000 Tolosa - M° Esquiròl - Tel : + 33 05 61 22 13 31
Programa DMOO - 2012-2013 :
- Dimècres 10 d’octòbre de 2012 - 18:30 - Alan VIAUT (CNRS) - Lengas minoritàrias e espaci en Euròpa : los marges linguistics territorials
- Dimècres 7 de novembre de 2012 - 18:30 - Joan-Loís MASSOURE (Universitat de Tolosa II-Lo Miralh) - Lo gascon, los mots e lo sistèma
- Dimècres 21 de novembre de 2012 - 18:30 - Nadine HENRARD (Universitat de Lièja, Belgica) - Lo teatre religiós dins l’Occitània medievala
- Dimècres 19 de decembre de 2012 - 18:30 - Maria-Joana VERNY (Universitat Paul-Valéry, Montpelhièr III) - Robert Allan (1927-1998), entre encantament del mond e desencantament
- Dimècres 23 de genièr 2013 - 18:30 - Christophe IMBERT (Universitat de Tolosa II-Lo Miralh) - Del Felibritge a l'Ecole Romane : los trobadors de Moréas e l'esperit d'una renaissença de las letras
- Dimècres 20 de febrièr de 2013 - 18:30 - Élodie de OLIVEIRA (Universitat de París-Sorbona, París IV) - La Canson del país (1948) : avèm besonh d’una edicion critica per (tornar) legir Joan Bodon ?
- Dimècres 20 de març de 2013 - 18:30 - Joan-Ives CASANOVA (Universitat de Pau e dels Países d’Ador) - Dins l’obrador de las fargariás : los trobadors de Joan de Nòstradama
- Dimècres 17 d’abrial de 2013 - 18:30 - Fausta GARAVINI (Universitat de Floréncia, Itàlia) - Montaigne occitan
Presentacion de Joan-Francés Courouau :
"Es la cinquena annada que nòstras conferéncias DMOO se debanan a l’Ostal d’Occitània. Destinadas a far accessiblas al nombre mai grand la frucha de la recerca universitària menada sus la matièra occitana – al sens larg –, rescontran un succès creissent al près de nòstres estudiants mas tanben d’un public alarguit compausat de curioses que s’interèssan a la cultura occitana e a la recerca scientifica.
"Lo programa es estat compausat en tenent compte de la diversitat de nòstras disciplinas : literatura medievala amb la medievista belga Nadine Henrard, modèrna amb Joan-Ives-Casanova, especialista de l’inventor dels trobadors, Joan de Nòstradama, lo sègle XIX amb lo comparatista Christophe Imbert sus un moment determinant de nòstra istòria literària, lo sègle XX gràcias a Maria-Joana Verny e Élodie de Oliveira que nos permeton caduna de tornar descobrir un grand autor, Robèrt Allan per l’una e Joan Bodon, per l’autra, la linguistica amb un dels melhors especialistas del gascon, Joan-Loís Massoure e la sociolinguistica amb l’especialista europenc Alan Viaut. E per claure l’annada universitària en beutat, sèm particularament aüroses e onorats de recebre, venguda especialament de Floréncia (Itàlia), la granda especialista de Montaigne, de la literatura francesa e de la literatura occitana, qu’es Fausta Garavini (17 d’abrial).
"Pròva sens dobte de son succès, pel primièr còp ongan, aquel partenariat amb l’Ostal d’Occitània e Convergéncia occitana benefícia del sosten dirècte de la Region Miègjorn-Pirenèus.
"Estudiants, collègas universitaris e ensenhaires o simples curioses, siatz planvenguts dins nòstres DMOO, dobèrts a totas e a totes, dins un esperit convivial de partatge de las coneissenças."
