'Retraches d'Occitània e de delà' de Gèli Combas (2024)

Las edicions del Grelh Roergàs publica Retraches d'Occitània e de delà de Gèli Combas.

Après Una lutz sul camin publicat en 2011 e Parladissas animalas en 2021, dos libres publicats a la edicions del Grelh Roergàs, Gèli Combas nos dona sos Retraches d’Occitània e de delà. Aquí sus 160 paginas, en trenta racontes nos fa traversar lo periòde de las annadas setanta a uèi e viatjar d’Occitània a Espanha.

Presentacin de l'editor :

Aqueste recuèlh, nos confirma las qualitats literàrias de Gèli Combas, un autor que fa viure remirablament la lenga. Sens jamai alassar lo legeire – al contrari – descriu dins los pus mendres detalhs los lòcs, los eveniments e los òmes dins lors activitats, lors compòrtaments, lors costumas, lors tissas, lors jòias e lors penas, de descripcions totjorn apassionantas, plan sovent esmoventas.

Sentiments, emocions, omenatges... Agachar davant, far amb la societat de uèi sens oblidar d’ont venèm ni renegar las nòstras raices !

Gèli Combas, albigés de naissença, passèt son enfança a Montfranc en Roergue Bas ont ausiguèt los sieus parlar occitan fins a lor darrièr buf.