OPLO octobre de 2022
Visual de l'eveniment © OPLO

Dins l’encastre de la Fèsta de la Sciéncia, l’Ofici Public de la Lenga Occitana (OPLO), en partenariat amb lo CIRDÒC organiza lo 11 d’octobre a 17h un debat en linha a l’entorn del tèma Biodiversitat e diversitat de las lengas : quina(s) lenga(s) per pensar e viure lo mond de deman ?

Los organizators vòlon a l'escasença d'aquel eveniment questionar la tendéncia generala actuala que nos mena cap al tot-anglés : lenga unica internacionala que poiriá supausadament garantir los escambis entre ciutadans del mond. Precisan que de nombrosas recercas scientificas e demarchas ciutadanas son al contracorrent d'aquela vision e meton al contrari en avant l’interès de la diversitat de las lengas per bastir lo mond de deman, quitament, per prepausar de solucions alternativas als problèmas societals e environamentals qu'anam inevitablement enfaciar.

Pels eles l’avenidor serà al bi-plurilingüisme.

La taula redonda del 11 d’octobre s’inscriu dins la tematica nacionala de l’eveniment Rescalfament climatic : atenuacion e adaptacion e preten presentar diferents trabalhs de recèrca e de vulgarizacion portant sus la plaça de las lengas, e subretot de l’occitan, dins una demarcha de desvolopament durable per tal de sensibilizar lo grand public a de manièras alternativas de considerar lor avenidor, en adeqüacion amb lor cultura e las especificitats de lor territòri.

Aquela reflexion animada per l’OPLO fa part integranta d’una estrategia de reconquista engatjada dempuèi mantunas annadas per fin que los abitants se reaproprian la lenga occitana, per que se practica e s’espandisca.