Congrès de l'AIEO de 2020 a Coni : centre e periferia

Lo XIII^en congrès de l'AIEO (Associacion Internacionala d'Estudi Occitan) se debanarà a Coni en Itàlia del 6 al 11 de julhet de 2020. Lo tèma ne serà : Centre e periferia.

Presentacion dels organizators – Lo XIII^en Congrès de l’Associacion Internacionala d’Estudis Occitans (AIEO) a coma tèma lo rapòrt entre centre e periferia dels domenis culturals e lingüistics (o tanben entre de centres e de periferias) e donc entre minoritat e majoritat, entre identitat locala e dimension nacionala e mai europèa e fin finala entre la concepcion de « frontièra-barrièra » e la de « frontièra-pont », valent a dire entre separacion e contacte. Aquela dialectica, complèxa e articulada, qu’es a l’encòp portaira d’innovacion e de desvolopament, se deurà concebre siá dins una dimension « intèrna » a la lenga e a la cultura d’òc, siá en relacion entre la lenga e la cultura d’òc e las civilizacions amb las qualas es en contacte despuèi l’Edat mejana e mai amb Euròpa tota.

Lo luòc del Congrès, Coni, la vila mai vesina de las valadas occitanas, nos mena necessàriament a nos interrogar sus de questions aital que mancaràn pas de far créisser las nòstras coneissenças, mas subretot la nòstra « consciéncia » qu’avèm uèi de la realitat occitana.

Coma de costuma, lo tèma causit poirà s’endevenir amb los interèsses de cercaires que trabalhan dins de domenis plan disparièrs mas que partejan l’interès per la lenga e la cultura occitanas : especialistas de literatura medievala, modèrna e contemporanèa, lingüistas, sociolingüistas, istorians de l’Edat mejana e de las epòcas modèrnas e contemporanèas, musicològs, antropològs, sociològs...

Sètz donc convidats a presentar de contribucions que s’acaran amb las questions definidas çai subre en foncion de las matèrias principalas que seguisson :

• lenga occitana medievala ;
• lenga occitana modèrna e contemporanèa ;
• literatura occitana medievala ;
• literatura occitana modèrna e contemporanèa ;
• istòria ;
• sociolingüistica.