Del 12 al 16 d'agost de 2019 se debanarà a Vilanòva d'Òlt l'estagi d'estiu de l'Escòla occitana. Per aquesta 45ena edicion son al programa : cors de lenga, espectacles, conferéncias, mas tanben formacions en informatica... Objectiu : popularizar e far viure la lenga.

Presentacion dels talhièrs especifics

Cant collectiu : de 11h15 a 12h15, animat per Ives Séguier. Per aprendre de cants tradicionals mai o mens coneguts, e pel plaser de cantar amassa.

Wikimedi'Òc : de 11h15 a 12h15 e de 18h00 a 19h30, animat per Aura Séguier. Per ensenhar al mond a contribuïr a la Wikipèdia occitana e als autres otisses de Wikimèdia.

Relaxacion : de 13h30 a 14h00, animat per Marion Bourgeois. Per tastar la prangièra relaxacion. Se pausar e se cultivar dins lo meteis temps. De contes, de racontes, de musica e de poesia... Es un talhièr participatiu perque cada jorn los qu'animan lo talhièr càmbian.

Dança per debutants : de 14h a 15h, animat per Ives Séguier. Per aprendre los passes de basa de las danças tradicionalas : rondèu, mazurka, polka, scottish...

Presentacion dels talhièrs a la causida de 15h15 a 17h00

Aqueles talhièrs son de causir lo diluns, e cal seguir lo meteis talhièr tota la setmana.

Etnografia : lo dire e lo far dins la civilizacion païsana : a taula, a la fèsta, al trabalh, a l'ostal, a la velhada, sus los camins, al lièch, en familha, etc. Del local a l'universal. Animator : Michèu Chadeuil.

Iniciacion a la toponimia : estudi dels noms de luòcs (païses, viles, vilatges, bòrias, rius, camins...) ; dins nòstre país, aqueles noms parlan occitan e son la memòria del passat : cultura, mestièrs, noms de familhas ancianas... Mas sovent semblan pro enigmatics... Cossí los estudiar ? Poiretz descobrir, amb de fichas de trabalh e de documents, lo metòde de recèrca, las aisinas utilas e los biaisses de far viure aqueles noms, que son nòstre patrimòni, un patrimòni menaçat que cal aparar. Animator : Joan Rigoste.

Descobèrta de la lenga e de la cultura catalanas : un tast de totes los aspèctes mai importants de la lenga e de la cultura catalanas, nacion bessona de l'occitana. Introducion a la lenga catalana, explicacion de l'istòria de Catalonha, descripcion teorica e pratica del folclòre catalan (la sardana)... Animatriz : Meritxell Pueyo Sotos.

Conversacion « Escotar e tornar dire » : per los que se vòlon metre a parlar occitan mas que gausan pas se lançar. Amb de contes cortets, de provèrbis, de viralengas, tirats dels tresaurs de la literatura orala occitana. Òm escota, òm torna dire, siá ensemble, siá cadun son torn e l'òm reten, tot en s'amusant. Animatritz : Maris-Odila Dumeaux.

Descobèrta del país : visita comentada en occitan dels luòcs toristics e istorics d'Òlt e Garona (bastida, castèl) qu'an un ligam istoric amb l'occitan. Animator : Bernat Bergé.

Informatica per la construccion d'otisses pedagogics : competéncias de basa per realizar aisidament de material pedagogic : retoca d'imatges, utilizacion dels estiles dins libreOffice, trabalh del son e de la vidèo, descobèrta de las bancas d'imatges a gratis... Animatritz : Aura Séguier.

[per ne saupre mai clicar]


Conte : 'Lo meu ostal' de Joan Bodon

Plancat

Lo recuèlh Contes del meu ostal de Joan Bodon sortiguèt en 1951.

Vidèo : lo tambornet

Tambornet

Presentacion de jòc de bala al tambornet. Una vidèo del CIRDÒC.

Union Europèa : ajudas a la infrastructuras de transpòrt

Ralh ferroviari

Lo dijòus 22 de junh de 2023 la Comission Europèa comunicava sus la politica de l'Union en matèria de transpòrt. Son 6,2 miliards d'èuros que seràn investits dins las infrastructuras.

Robèrt Lafont : a prepaus de la mòrt del general de Gaulle

Glèisa Nòstra Dòna de París lo 12 de novembre de 1970

En 1970 morissiá lo general de Gaulle. Dins lo numèro 22 de la revista Viure, Robèrt Lafont tornava sus l'eveniment.

Qualques reflexions de Florian Vernet sus la lenga occitana

Occitan estandard - Vernet

Dins lo present article, paregut en 2016, Florian Vernet presentava sas reflexions sus la situacion de la lenga occitana.