Del 10 al 13 de julhet de 2021 se debanarà a Nimes l'Universitat Occitana d'Estiu
L'eveniment es previst ongan en presencial a l'ostal diocesan de Nimes. Lo subjècte ne serà : òme/animal quinas evolucions dins las relacions ?
L'animal, dometge o salvatge, real o imaginari, serà donc al centre d'aquesta universitat. Son totas las relacions qu'entretenèm amb los animals que seràn questionadas. Relacions nombrosas, los animals essent present amb nosautres pel trabalh o los lésers, fan tanben part de nòstra alimentacion, noirisson las nòstras cresenças.
Entre collaboracion, respècte, afrontament, paur o veneracion, son d'univèrs culturals multiples que dempuèi de milenaris se bastisson entre l'òme e l'animal. Diferents especialistas vendràn balhar a Nimes lors testimoniatges e analisis.
Aquí çai-jos qualques eveniments del programa :
- Lo dissabte 10 de julhet, podretz ausir Josiana Ubaud parlar de las plantas preferidas del bestiari salvatge e de las plantas medicinalas pels animals.
- Lo dimenge 11 de julhet Maria-Joana Verny presentarà lo bestiari dins la literatura occitana.
- Lo diluns 12 de julhet, Margot Constans evocarà la falconeriá al sègle XII.
- Lo dimarç 13 de julhet, Jean-Noël Pelen presentarà lo rapòrt entre las societats ruralas tradicionalas e lo « salvatge encantat ».
L'eveniment es organizat per la MARPÒC.
*
