En 2011 foguèt publicat lo primièr tòme de la colleccion Classics occitans : Lo libre dels ausèls d'Antonin Perbòsc. Joan Thomas dins la revista de l'IEO Occitan ! numèro 138 presentava aquesta nòva colleccion.
Los classics occitans
La novèla colleccion Classics occitans es nascuda de la necessitat de tornar donar a un public larg los grands tèxtes de la literatura nòstra que se pòdon pas mai trobar que dins las bibliotècas. Dempuèi qualques annadas, es devengut plan mal aisit pels ensenhaires coma pels estudiants, o per un public mai grand, de trobar d'òbras de la literatura occitana que son majoralas. La lista dels artesans « desapareguts » de la literatura es longa ; ara per ara las escasenças de los legir son claras e – en fòra de las antologias – es gaireben impossible de se poder carrar amb las poesias de Jean-Henri Fabre, de Clovis Hugues o los romans de Valère Bernard.
Avèm volgut que l'elegància de la colleccion siá sostada per la sobrietat de l'edicion. Aicí, es pas una edicion scientifica que trobaretz. Plan paucas nòtas, un lexic s'aquò es necite mas sempre una introduccion de la man d'un especialista tan plan que biografia e bibliografia de l'autor per benlèu perlongar lo gost de la lectura.
L'edicion del tèxte es basada sus l'edicion originala e la lenga de l'autor es conservada. Aital es lo prètzfach de la novèla colleccion Classics occitans.
Joan Thomas
Son estats publicats dins la colleccion :
- Lo libre dels ausèls d'Antonin Perbòsc (2011) ;
- Les cants del solelh d'August Forés (2015) ;
- La miugrana entredubèrta de (2017) ;
- Òbra poëtica de Leon Còrda (2020).
