Del 4 de novembre entrò a la fin de l'an de 2019, lo membre d’acuèlh de l’ostal de la vila de Montpelhièr reçaupiá la mòstra Beate e Serge Klarsfeld, los combats de la Memòria 1968-1978.

La revista numèro 447 d'octobre de 2019 editada per la comuna presentava aquesta realizacion : un agach pausat sul destin d’aqueste parelh que faguèt de sa vida un combat per la memòria de las victimas de la Shoah.

 

Klarsfeld : doas consciéncias per l’umanitat

Dos pichons noms e un meteis nom. Los d’un parelh unit per la vida e animat pel meteis combat desempuèi quicòm coma 60 annadas. Un camin tras que brave que, de son vivent, a integrat los libres d’istòria. Beate e Serge Klarsfeld son l’incarnacion d’una lucha. Totes dos – ela filha d’un soldat de la Wehrmacht e el filh d’un josieu roman deportat a Auschwitz – an vodat una brava partida de sa vida a traçar los ancians nazis que visquèron en tota impunitat après 1945 e se batèron amb fòrça contra l’antisemitisme e per la memòria de las victimas de la Shoah. L’an passat, a la meteissa epòca, lo membre de las mòstras de l’Ostal de Ciutat de Montpelhièr aculhiguèt la mòstra Stalingrad, apèl a la patz. Ongan, es tornarmai question de memòria amb aquestas doas personalitats de tria amb Beate e Sèrgi Klarsfeld, los combats de la Memòria 1968-1978. Una mòstra caminaira, concebuda e realizada pel Memorial de la Shoah a París. Serà vesedoira al Clapàs del 4 de novembre 2019 cap al 3 de genièr de 2020.

La mòca

Se lo public bèl coneis mai que mai los Klarsfeld per aver menat Klaus Barbie davant los tribunals o jogat un ròtle màger dins los procèsses Bousquet, Touvier o Papon, aquesta mòstra, creada en 2018, s’interèssa mai que mai a una decennia. Aquela (1968-1978) que l’accion del parelh Klarsfeld va conéisser un resson internacional e que l’evolucion de la memòria de la Shoah bolèga enfin las consciéncias d’un continent cap a l’autre.

1968, es l’annada que Beate Klarsfeld pega una mòca a Kurt Georg Kiesinger. Per ela, èra inconcevable que lo cancelièr oèst-alemand pòsca èstre l’ancian responsable de la propaganda radiofonica d’Hitler.

1978, es l’annada de la publicacion per Sèrgi Klarsfeld e sa molhèr d’un trabalh fòrça brave de quinze annadas : lo Memorial de la deportacion dels Josieus de França.

Aquesta mòstra es facha de panèls amb contengut istoric, de fotografias e documents emai d’objèctes qu’apartenguèron als Klarsfeld. Aital retrobam doas mariòtas amb lors vestits, de medalhas e diplòmas, de cadenas estacadas sus un banc, l’agenda de Sèrgi Klarsfl es del temps del procès de Colònha que, tre 1979, veirà comparéisser tres dels responsables màgers de la « Solucion finala ».

Beate e Serge Klarsfeld publiquèron lors memòrias en 2015. Incredibla trajectòria qu’aquesta : la d’un engatjament personal que trobèt un resson brave que brave al ponch d'intrar en resonància amb l’istòria del sègle XX.


 

Lo fiu de l'uòu - Robèrt Lafont

Dins lo conte Lo fiu de l'uòu publicat en 2001 per Atlantica, Robèrt Lafont s'arrèsta dins sa narracion a Besièrs en 1209 del temps de la crosada e del grand masèl. Extrach.

Lo robòt Perseverance es arribat sus Mars

Fòto Perseverance

Lo robòt Perseverance s'es pausat sus la planèta Mars lo 18 de febrièr de 2021.

Nòva : 'La lutz e l'ombra' de Valèri Bernard

Johann Heinrich Füssli 'La cachavièlha'

En 1938 dos ans après sa mòrt sortissiá lo recuèlh de nòvas La feruno de Valèri Bernard.

Robèrt Lafont : Laus de Provença (2007)

nimes

Dicha de Robèrt Lafont a l'ocasion de la remesa del Grand prèmi literari de Provença en 2007.