Dins son magazine del mes d'octobre de 2020 la region Occitània comunicava sus sa politica en favor de l'ensenhament bilingüe occitan/francés.
Auça dels efectius dins las escòlas bilingüas occitanas
Doas convencions novèlas per l’ensenhament de l’occitan dins las acadèmias de Montpelhièr e Tolosa seràn signadas dins las setmanas que venon.
Mentre qu’una convencion quadre foguèt signada per la Region, l’Ofici public de la lenga occitana e lo ministèri de l’Educacion nacionala en 2017 per desvolopar e estructurar l’ensenhament de l’occitan, la Presidenta Carole Delga signarà dins las setmanas qu’arriban doas convencions academicas relativas a sa mesa en òbra.
Aquestas convencions pertocaràn las acadèmias de Montpelhièr e Tolosa. Definidas pel periòde 2020-2022, an per amira notadament d’augmentar de 26 % los efectius d’escolans bilingües en dobrissent de cursus novèls (escòlas publicas e calandretas), de far créisser lo nombre d’escòlas, collègis e licèus que propausan l’aprendissatge de l’occitan, e tanben de multiplicar las activitats de sensibilizacion a la lenga regionala de l’escòla fins al licèu.
La Region trabalha tanben sus una convencion per l’ensenhament del catalan que serà prèsta per la fin d’annada 2020.