Lo CIRDÒC-Mediatèca Occitana lança un apèl a comunicacions e contribucions per las jornadas d’estudi que
se tendràn a l’escasença del 90en anniversari de la creacion del Collègi d’Occitània lo 8 e 9 de decembre de
2017 a Castèlnòu d'Arri :
Creat a Castèlnòu d'Arri per Prosper Estieu e Josèp Salvat en 1927, lo Collègi d’Occitània joguèt un ròtle màger dins l'afirmacion de la modernitat occitana al sègle XX e prefigurèt los combats e questionaments de l’occitanisme contemporanèu coma los que portavan sus lo sistèma grafic, l’importància de la vitalitat literària, la contra-lectura de l'istòria de França, l'innovacion pedagogica e la fraternitat occitano-catalana.
Fòrt de l'òbra immensa de sos dos fondators, completada per la d’importantas personalitats occitanas coma Loïsa Paulin, Aquiles Mir, August Forés, Antonin Perbòsc, Philadelphe de Gerde, Loís Piat e Ismaèl Girard, lo Collègi d’Occitània a amassat una importanta bibliotèca e d'archius rics depausats al CIRDÒC en 2013. Aquelas jornadas son estadas pensadas per facilitar l’accès a tota aquela documentacion.
A l'entorn del subjècte « Le Collège d’Occitanie, ici et ailleurs » las comunicacions permetràn de soslinhar l'apòrt de l'associacion e de sos membres al desvolopament scientific e cultural de l’idèa occitana sus lo territòri occitan mas tanben al-delà dempuèi la debuta del sègle XX. S’agirà d'estudiar l'òbra e l’influéncia dels membres del Collègi d'Occitània que, per lor apròcha de l’estudi e de la promocion de la lenga d'òc li an permés d’impactar un public fòrça eterogenèu, a l'encòp popular e scientific, de tota tendéncias politicas, en França coma a l'estrangièr.
Aquelas jornadas d’estudi seràn programadas al dintre d’una setmana dedicada al Collègi d’Occitània a Castèlnòu d'Arri per una seria de conferéncias, concèrts, visitas e d’una exposicion que metrà en lum las pèças mai remirablas de las colleccions del Collègi.
Adreiçar las proposicions d'intervencions (1 pagina maximum : resumit, presentacion de l'intervenent) abans lo 31/08/2017 a :
Aurélien Bertrand : a.bertrand (at) cirdoc.fr
Université Populaire du Lauragais : marietherese.dorgler (at) hotmail.fr
Centre Lauragais d’Études Scientifiques : clescastel (at) gmail.com
