Entrò al 31 de decembre de 2017 a destinacion dels bibliotecaris de la Region Occitània lo CIRDÒC, LR2L e lo CRL-Midi-Pyrénées organizan una enquèsta suls besonhs professionals en matièra de lenga e de cultura occitanas.
Lor objectiu es de desvolopar l’ofèrta de formacion, d’otisses e d’acompanhament dels professionals dels establiments engatjats dins la preservacion e la promocion de la lenga e de la cultura occitanas.
« Las colleccions de las bibliotècas de las collectivitats publicas devon èsser representativas, caduna a son nivèl o dins son especialitat, de l’ensemble de las coneissenças, dels corrents d’opinion e de las produccions editorialas. Devon respondre als interèsses de totes los membres de la collectivitat de servir e de totes los corrents d’opinion, dins lo respècte de la Constitucion e de las leis. » Çò dis l'article 7 de la Carta de las Bibliotècas francesas (Conseil supérieur des Bibliothèques, 1991).
Los organizators d'aquela enquèsta constatan que nombrosas son las bibliotècas publicas, collectivitats o professionals que sollicitan lo CIRDÒC per beneficiar d’otisses, de retorns d’experiéncias, de coneissenças, de saber-fars professionals o de dispositius d’ajuda per contribuir a valorizar e a facilitar l’accès del mond a la lenga e a la cultura occitanas. Aquò dins l'encastre de lors activitats professionalas.
L’ofèrta del CIRDÒC es rica e variada mas sovent desconeguda dels quites bibliotecaris, e de còps inadaptada a lors besonhs especifics, puèi que càmbia en foncion dels servicis de la bibliotèca, dels territòris o dels publics.
Una melhora coneissença d'aqueles besonh es necessària per desvolopar una ofèrta de formacion, d’otisses e d’acompanhament mai adaptats als besonhs e enjòcs de cadun.
Aquela enquèsta vòl comolar aquel voide.
Sètz biblotecaris en region Occitània ? Per respondre a l’enquèsta en linha :
