Lo Cercle occitan de Carcassona organiza per Nadal una sèria d'eveniments a l’Ostal Sirventés (79, la Trivala, Carcassona).
Aquel Temps de Nadal serà virat ongan cap a la mar, als rius e als peisses amb d'animacions titoladas Sopa de peisses :
- Lo divendres 15 de decembre de 2017 a 18h30 se farà l’estrena d’una mòstra de pinturas e fotografias de Maxime Poulain que balharà a l’encòp una conferéncia suls peisses e lor maire qu’es tanben la nòstra : la maire-mar.
- Lo divendres 22 a 18h30, se poirà tastar (amb las aurelhas) un Bolhabaissa poetic mediterranèu, version poetica de la celèbra sopa preparada als fornèls pel pescafin Brunò Peiràs.
Los dos intervenents precisan que « Los peisses... Aqueles abitants de l’aiga, que i son coma un peis... dins l’aiga, o coma un aucèl dins l’aire, es a eles que volèm rendre omenatge. Peisses d’argent, peisses de lum, peisses que los pescaires espèran la nuèit e lo jorn. Peisses que n’i a de mens en mens e que los cal salvar, coma plan maitas bèstias, de la predacion e de la pollucion umanas. »
De mai per aquel Temps de Nadal se tendrà tanben :
- la grépia occitana ;
- lo diluns 18 de decembre a 19h : una tasta de chocolats (chocolatièr Belin, d’Albi) e vins de Maurin/Maury ;
- lo dimècres 20, 18h30 : Paraulas de Nadal (cadun(a) conta, canta, ditz Nadal...)
Los organizators precisan que 2018 se dobrirà lo divendres 5 de genièr a 18h amb las còcas dels Reis del Cercle Occitan del País de Carcassona e de l’IEO Aude e las cantinas de blanqueta de Limós amb, al bèl mitan de la taula, la Copa de França de rugbí de XIII emportada en 2017 per l’AS Carcassona.
