Visual, Total Festum
Dins son magazine de l'estiu de 2024 la region Occitània presentava l'edicion de venir del festenal Total Festum.
Total Festum : una cabussada festiva dins la riquesa culturala d'Occitània
Dempuèi 2006, lo festival Total Festum fa la promocion de las lengas e culturas catalanas e occitanas de pertot en Occitània. Ofrís, fins al 9 de julhet, mai de cent vint rendètz-vos dins tota nòstra region. Una programacion rica que mesclarà espectacles, exposicions, rescontres, balètis e concèrts gratuït.
Total Festum es un festenal fòrt e federador que mobiliza los actors associatius e los abitants a l’entorn d’eveniments de proximitat, mas tanben d’eveniments mai importants e toristics, coma la Sant Joan de Cotlliure, la Janada d’Albi...
Après un lançament l’an passat en país occitan a Seta, ongan, per sa 19ena edicion, l’obertura de Total Festum s’es debanada en tèrra catalana, dins una comuna ont lo catalan es ensenhat a l’escòla publica, Sant Hipòlit (Pirenèus Orientals). Lo site de La Font del Port, classificat Natura 2000, a la broa de l’estanh de Salses, es estat causit per sa biodiversitat lagunària e pel trabalh patrimonial menat per l’associacion Bonança. Es ailà que se tròba la barraca tradicionala de Bonança, associacion que restaura, entreten e fa navegar de barcas catalanas, e que, mai amplament, fa viure las tradicions catalanas.
Total Festum es tot a l’encòp l’escasença de viure las culturas occitanas e catalanas e de practicar o de s’iniciar a aquestas lengas. La senhaletica dels eveniments dels festival es bilingüa e i son prepausats maites talhièrs d’iniciacion. Per tal d’acompanhar lo public, la Region, amb lo Centre internacional de recèrca e documentacion occitanas (CIRDÒC) e l’Ofici Public de la Lenga Catalana, fornís una miniguida per far la fèsta en catalan e en occitan. Rituals tradicionals, castèls umans, animals totemics, balètis, concèrts, espectacles, lecturas, talhièrs, debats, jòcs, espòrts, passejadas, gastronomia...
Cada an, en junh, son un fum d’escasenças de descobrir, transmetre e partejar nòstras lengas e culturas occitanas e catalanas.
