A la debuta de 2025 lo responsables del master Estudi e Valorizacion dels Patrimònis Occitan e Catalan (EVOCA) presentava la formacion propausada a l'Universitat Joan Jaurés de Tolosa.
Lo master Estudi e Valorizacion dels Patrimònis Occitan e Catalan (EVOCA)
Aquel master, propausat en presencial e en distancial (dispositiu EVOCA-D), permet a tota persona eissida de licéncias d’occitan o de catalan o tot simplament fòrça interessada per l’una d’aquelas lengas-culturas o las doas, de s’especializar dins un domeni de recèrca o dins la gestion culturala.
L’estudiant recep aital una formacion sus las airas occitana e catalana e aquerís de competéncias transversalas, çò que li permet, dempuèi son especialitat lingüistica, de melhor comprene los enjòcs e las possibilitats de promocion del patrimòni passat o present d’una o de las doas lengas-culturas.
Aital, dempuèi 2021, los cincanta dos estudiants qu’an seguit aquel master unic en França e en Espanha an pogut :
- desvolopar de subjèctes de recèrca sus la lenga (sociolingüistica, dialectologia), la cultura (literatura, fotografia, teatre, etc.), al crosament sovent de questions societalas coma l’identitat minorizada o los estudis de genre, per exemple ;
- o pensar de projèctes de valorizacion del patrimòni (organizacion d’un festenal de contes, creacion de contenguts sus las rets socialas, traduccion per videojòcs, desvolopament toristic en local o a l’internacional) qu’an pogut far dialogar amb lors estagis professionalizants (administracions – Region Occitània, Conselh General de Tarn, Delegacion de l’Institut Ramon Llull... — , oficis de torisme, musèus, mediatècas, archius, entrepresas privadas audiovisualas e radiofonicas, salas d’espectacles — Palau de la Música Catalana... —, associations culturelles, tiers-lieux — La Ciutat a Pau, La Topina a Toulouse...).
L’equipa pedagogica, compausada d’ensenhaires-cercaires aital coma de professionals del patrimòni e de la gestion culturala, a mes en plaça un ensenhament de proximitat per ajudar los estudiants a optimizar lors sabers e saber-far, e a aprofechar al melhor aquel diplòma EVOCA dins lor trajècte professional e personal.
Poiretz descobrir çai-jonch lo programa d’aquel master, matèria per matèria. Avètz egalament accès a de presentacions generalas sus aquestas doas paginas del site de l’Universitat Tolosa-Joan Jaurés (UT2J) : presentacion e programa.
Una reünion virtuala d’informacion suls mastèrs de l’UT2J es programada dijòus 6 de març de 2025 de 18h a 20h. Çai-jos trobaretz las informacions sus aquela serada :
soiree-virtuelle-des-masters-jeudi-6-mars-2025
- 18h-18h45 – Conferéncia introductiva : construire son projècte e preparar sa candidatura per estudiar en master dins l’acadèmia de Tolosa.
- 18h45-20h – Presentacion dels masters (en doas sesilhas : 18h45 e 19h15) : s’informar sus las formacions consideradas e escambiar amb las equipas pedagogicas.
Lo ligam Zoom per un rencontre amb los responsables del master EVOCA en segonda partida es lo seguent : ligam zoom.
