Lo site Occitanica ven de dubrir.
Presentacion : Occitanica es un projècte de mediatèca virtuala dins l'accepcion tota d'aqueste mot :
- del meteis biais que dins una mediatèca publica "fisica" o "reala", de bibliotecaris desvolopan e enriquison Occitanica a respècte dels besonhs dels publics variats de uèi. Rason perqué podètz intervenir dins lo desvolopament d'Occitanica, que podètz exprimir en linha vòstres besonhs documentaris per exemple : nos podètz demandar de numerizar tala o tala òbra en particular, nos assabentar de vòstres espèrs (tèmas que vos interèsson, recèrcas que volètz menar, centres d'interès que vos agradan, etc.), e podètz avalorar tanben los contenguts en linha (nos podètz prepausar de complements d'informacion, una correccion de contengut argumentada... Ajatz pas paur d'o nos far passar !)
- una mediatèca prepausa una diversitat bèla de mèdias porgits al public. Pr'amor d'aquò, tant las colleccions coma los contenguts publicats dins Occitanica se limitan pas a de tèxtes o d'imatges. Occitanica vos prepausa un fum d'intradas dins la lenga e la cultura occitana : mòstras virtualas, e-maletas pedagogicas, libres e tèxtes ancians numerizats, vidèos documentàrias, registraments sonòrs, etc.
- una mediatèca, aquò's tanben un servici de mediacion cap a la cultura e als sabers. Per o far, s'apiejam sus las competéncias d'ensenhaires, de cercaires o d'especialistas per que produscan de contenguts d'introduccion e d'explicacion a l'entorn de las ressorças patrimonialas d'accès malaisit. Aisirà l'intrada dins las òbras, notadament quand l'internauta mestreja pas la lenga e la cultura occitana.
- una mediatèca collectiva : administrada pel CIRDÒC-Mediatèca occitana, establiment public de vocacion interregionala cargat de conservar, senhalar e valorar lo patrimòni occitan, Occitanica es una aisina estructuranta compartida e enriquesida per la ret dels actors del patrimòni, de la cultura e de la recèrca en domeni occitan.
