Un article del jornal Atout Tarn - Numèro 98 - Decembre de 2013 e genièr de 2014 :
Bibliotèca despartamentala de Tarn l’occitan fa sa mala !
En partenariat amb la Mission occitana del Conselh general, la Bibliotèca Despartamentala de Tarn (BDT) ven de crear quatre malas pedagogicas que caduna clau un quarantenat de documents multimèdias sul patrimòni occitan. Fachas per rendre l’occitan accessible a cada Tarnés e ajudar los ensenhaires e intervenents pedagogics, las malas se son montadas per nivèl de coneissença :
- « Descobèrta de l’Occitan » : per tot public
- « L’Occitan a l’escòla » : pels ensenhaires e escolans del primari en prioritat
- « L’Occitan pels collegians » : pels escolans e professors de collègis en prioritat
- « Per aprigondir l’Occitan » : per tot public amb de libres pels iniciats
CD e DVD musicals e artistics, libres istorics, economics e culturals, romans, BD, diccionaris, metòdes d’aprendissatge lingüistic e documentaris garnisson las malas que fan mòstra de la modernitat e del vam de la creacion occitana a mai rendon omenatge a las òbras màgers de la literatura occitana.
Las malas son mesas a dispausicion del malhum despartamental de las bibliotècas. Prioritarament per las estructuras collectivas (escòlas, collègis, associacions culturalas e socialas...), las malas seràn accessiblas en demandant a la bibliotèca de vòstra comuna que se cargarà de ne far reservacion a la BDT. Las malas atanben se pòdon metre a dispausicion dels usatgièrs de la bibliotèca dins lo cadre d’animacions.
