Ivèrn-Prima de 2013 - Lei d'educacion - França
1 - Calandreta comunica :
Calandreta vòl l'occitan dins la lei d'educacion.
Lo governament fa ara una lei sus l'educacion. Maugrat los engatjaments de Hollande donats a la manifestacion de Tolosa per J.-P. Bel president del Senat, i a pas res sus las lengas regionalas dins la lei que prepausa lo ministre Peillon. Es una vergonha, un mesprés total. Nos cal bolegar per faire cambiar lo projècte de lei. Per aquò Calandreta apèla a la manifestacion del 16 de febrièr a Montpelhièr. Cal que la Lei de l'Educacion marque per lo Ministèri l'obligacion d'ensenhar l'occitan e las lengas regionalas coma es marcat dins la Lei pel còrse. Es la clau per aver de pòstes, tant per nautres que pel servici public. De mejans per l'occcitan !
2 - País Nòstre comunica :
Es aquò lo cambiament ?
País Nòstre protèsta amb vigor contra los projèctes de lei de l’Educacion e de la Decentralisacion que s'anoncian calamitoses per las lengas regionalas.
Çò que se prepara dins la futura lei Peillon es simple : res! Pas un mot per parlar de l'ensenhament de las lengas regionalas, que i son quitament pas marcadas un còp.
Qu'una vergonha ! Quand pensam qu'aquelas lengas son patrimòni de França dins la quita Constitucion...
Aquí contunha la politica que nos escana, que sabèm ben que l'avenidor de las lengas regionalas passa per un ensenhament.
Las mencionar quitament pas es las negar : ont an vist que d'escòlas, de collègis o de licèus s'anavan cargar d'oras d'ensenhament pas previstas ?
Per l'occitan, la futura lei Peillon serà tant marrida coma la lei Fillon : ont es passat lo cambiament promés ?
Ont son passadas la polidas frasas, las de Hollande per la boca de Jean-Pierre Bel lo president del Senat, vengut dire a la manifestacion occitana de Tolosa qu'acampèt 30 000 personas lo 31 de març passat ? « Le nouveau président ouvrira la voie à une législation de protection et de promotion des langues et cultures régionales » nos diguèt lo president del Senat.
Denonciam l'inegalitat de las lengas dins la lei (Còde de l’Éducation, article L 312-11-1) : « la langue corse est une matière enseignée dans le cadre de l'horaire normal des écoles maternelles et élémentaires ».Disèm qu'en Lengadòc l'ensenhament de la lenga d'òc se deu far normalament coma la lenga còrsa s'ensenha en Corsega !
E la lei de Decentralisacion que son a nos preparar es pas gaire mai positiva : prevei que las Regions « peuvent déterminer des 'activités éducatives et culturelles' complémentaires relatives à la connaissance des langues et cultures régionales » e que ten-te Maria que l'ase va trotar ! - « ces activités peuvent se dérouler pendant les heures d'ouverture des établissements scolaires » !!! Vertat es que quand son barrats, los establiments, es mens aisit d'i intrar...
La volontat de négativitat e lo desir d'anar en contra son talament fòrts en cò d'aquel mond QUE MARCAN D'ASENADAS coma quand dison qu'es possible que « ces activités aient lieu au moment ou les établissement sont ouverts ». Possible vòl dire que nos faràn un pichòta favor de tal en tal...
Pais Nòstre demanda a totes los que vòlon salvar la lenga occitana e li bastir un avenidor a venir a Montpelhièr per manifestar lo desacòrdi total amb aquela mena de projèctes preparats pel govèrn. Manifestarem a la Prefectura, puèi al Rectorat e enfin a la Drac, lo dissabte 16 de febrièr de 2013 a partir de 13h30. Partirem del Peiron a 14 h.
Nos daissarem pas tòrcer, l'occitan viurà !
País Nòstre sona totas las associacions occitanas e lor demanda de se jónher dins aquesta accion per butar lo govèrn e que cambie sos projèctes.
